‘അമ്മ കഴിഞ്ഞ ആഴ്ച പോയതാ ‘അമ്മ അവിടെ ഇല്ലെങ്കിൽ പപ്പാ ഫുൾ ടൈം വെള്ളത്തിലാണ് .. അതും അവിടെ തോട്ടത്തിൽ വാറ്റുന്ന സാധനം ..അതുകൊണ്ട് അമ്മക്ക് ഇവിടെ നിന്നാൽ സമാധാനമില്ല ..പിന്നെ ചേട്ടായി, കല്യാണ വിഷയത്തിൽ രേഷ്മയും അമ്മയും തമ്മിൽ മാനസിക അകൽച്ചയും ഉണ്ടെന്നു കൂട്ടിക്കോ ..അതുകൊണ്ട് വഴക്ക് ഒഴിവായിക്കോട്ടെ എന്ന് കരുതി ഞാനും അമ്മ പോകുന്നതിനു എതിര് പറയാറില്ല ..പിന്നെ അത്യാവശ്യം വല്ലതും ഉണ്ടെങ്കിൽ അവളുടെ അമ്മ വന്നു നിൽക്കും.

അഹ് ഓക്കേ..അപ്പൊ ഞാൻ ഇവിടെ ഇല്ലെങ്കിലും എന്നെ പറ്റി ചർച്ചകൾ നടക്കുന്നുണ്ടല്ലേ?

അത് പിന്നെ ഇല്ലാതെ ഇരിക്കുമോ ..യഥാർത്ഥത്തിൽ നിങ്ങൾ തമ്മിൽ എന്താണ് പ്രശ്നമെന്ന് രണ്ടു പേരും പറഞ്ഞിട്ടില്ല. അതുകൊണ്ട് ആളുകൾ ഓരോന്ന് സങ്കല്പ്പിച്ചു പറഞ്ഞു കൂട്ടുന്നു.. സത്യത്തിൽ എന്താ ചേട്ടായി പ്രശ്നം?

അതൊക്കെ കഴിഞ്ഞ കാര്യമല്ലേ ..ഇനി അതിനെക്കുറിച്ചു പറഞ്ഞിട്ട് എന്ത് കാര്യം ..നടന്നത് നടന്നു .. ഇപ്പൊ അവൾ സന്തോഷമായി ജീവിക്കുന്നുണ്ടല്ലോ.. അത് മതി.

ഓ അതൊന്നും പറയാതെ ഇരിക്കുകയാ നല്ലത്. ആദ്യകാലത്തു ഭയങ്കര സന്തോഷമായിരുന്നു. ഒരു മോനുണ്ട്. ഇവനെക്കാൾ രണ്ടു മാസം മൂത്തത്. ഇടയ്ക്ക് ഒരു വിസ തട്ടിപ്പ് കേസിൽ കുടുങ്ങി..

അവൻ പറ്റിച്ചതാ എന്ന് പറഞ്ഞു ആളുകൾ വീട്ടിൽ ചെന്ന് ബഹളം വെക്കലും ഒക്കെയായി ഭയങ്കര സീനായിരുന്നു. അറുപതു നേഴ്‌സുമാർക്ക് സൗദി വിസ കൊടുക്കാം എന്ന് പറഞ്ഞു അഞ്ചു ലക്ഷം വെച്ച് വാങ്ങിയെന്ന്…!!