“ഇത് സീത. സ്വാമിയുടെ മകളാണ്. തമ്പുരാട്ടി ചെന്നോളൂ”,

തിരുമേനി പറഞ്ഞപ്പോൾ സീത ദേവകി തമ്പുരാട്ടിയെയും കൂട്ടിപ്പോയി.

സീത ദേവകി തമ്പുരാട്ടിയെ ഊണുമുറിയിൽ എത്തിച്ചു. സീതയും പരിചാരികമാരും കൂടെ തമ്പുരാട്ടിക്ക് ഊണ് വിളമ്പി. വിഭവങ്ങൾ കണ്ടു തമ്പുരാട്ടി അമ്പരന്നു.

“തമ്പുരാട്ടി ഉണ്ടെന്ന് കേട്ടപ്പോൾ വേഗത്തിൽ എല്ലാവരും കൂടെ ഉണ്ടാക്കിയതാണ്”,

സീത പറഞ്ഞു.

ഊണ് കഴിഞ്ഞു പായസവും കഴിച്ചു കഴിഞ്ഞു തമ്പുരാട്ടി പറഞ്ഞു.

“കഴിച്ചത് അല്പം കൂടിപ്പോയോന്നു ഒരു സംശയം ഇല്ലാതെയില്ല”.

അപ്പോഴേക്കും ഒരു പരിചാരിക ഒരു ഓട്ടു ഗ്ലാസ്സിൽ ഒരു പാനീയം കൊണ്ട് വന്നു.

“ഇത് തമ്പുരാട്ടി കുടിച്ചോളൂ. വയറിനു നല്ലതാണ്. കൂടാതെ പായസത്തിൻ്റെ ആ മധുരത്തിന് അല്പം എരിവ് നല്ലതാണ്”,

സീത പറഞ്ഞു.

തമ്പുരാട്ടി അതു വാങ്ങി കുടിച്ചു.
അതു കഴിഞ്ഞു തമ്പുരാട്ടിയെ സീത ഒരു വലിയ മുറിയിൽ കൊണ്ട് പോയി. വലിയ പട്ടുമെത്ത.

“തമ്പുരാട്ടി ഒന്ന് വിശ്രമിച്ചോളൂ”,

സീത പറഞ്ഞിട്ട് വാതിൽ ചാരി പ്പോയി.

ദേവകി തമ്പുരാട്ടിക്കു കൊടുത്ത പാനീയത്തിൽ ശരീരത്തിന് സുഖം തോന്നാനുള്ള ചില കൂട്ടുകൾ ദത്തൻ തിരുമേനി ഉണ്ടാക്കി വെച്ചത് സീത ചേർത്തിരുന്നു. കിടന്നു അല്പം കഴിഞ്ഞു ദേവകി തമ്പുരാട്ടി ഉറങ്ങിപ്പോയി.

ഡ്രൈവർ പിള്ളയേയും വാര്യരെയും സ്വാമി വേറെ അല്പം മാറിയുള്ള ഒരു കെട്ടിടത്തിൽ കൊണ്ട് പോയി സൽക്കരിച്ചു.