പ്രണയം എന്ത്? എങ്ങനെ ?
പ്രണയം – പുറത്തിറങ്ങിയപ്പോൾ രഞ്ജു പാട്ടുംപാടി വരുന്നു….
“‘അളിയാ ഒന്ന് പെട്ടെന്ന് വാ'”….
“‘ഹോ വരുവല്ലെ…..ഡാ ചേച്ചി എന്തിയേ….വണ്ടി ഇല്ലാലോ'”…..
“‘ആ… അവള് പോയി…..നീ ഒന്ന് പെട്ടെന്ന് വന്നെ'”….
“‘അതെന്ത് അവള് നേരുത്തെ പോയെ'”…..
“‘ആ….എനിക്ക് അറിയില്ല…നീ വന്നു വണ്ടിയിൽ കേറ്'”….
പിന്നെ അവനൊന്നും ചോദിച്ചില്ല.. ഞങ്ങൾ കോളേജിലേക്ക് ഇറങ്ങി……കോളേജ് എത്തിയിട്ട് പല വട്ടം ജാനിയേ കാണാൻ ശ്രമിച്ചെങ്കിലും നടന്നില്ല..
ഫസ്റ്റ് ഹവർ സാർ വന്നു എന്തൊക്കെയോ പഠിപ്പിച്ചിട്ട് പോയി….പക്ഷേ എൻ്റെ മനസ്സ് മുഴുവൻ ജാനിയെ ഏങ്ങനെ സമാധാനിപ്പിക്കാം എന്ന ചിന്തയിലായിരുന്നു..
സെക്കൻ്റ് ഹവർ ജാനിയായിരുന്നു. ജാനിയെ കണ്ടപ്പോൾ ഒരു കുളിർമഴയായിരുന്നു എൻ്റെ ഹൃദയത്തിൽ..പക്ഷേ അവൾ എന്നെ മൈൻഡ് പോലും ചെയ്തില്ല….ഞാൻ അവളെ തന്നെ നോക്കി നിന്നു . പക്ഷേ അവളിൽ നിന്നും സ്ഥിരമുള്ള കള്ള കണ്ണിട്ട് നോട്ടം പോലും ഇന്നുണ്ടായില്ല….അവളുടെ ശ്രദ്ധപിടിച്ച് പറ്റാൻ പലതും ചെയ്തു….പക്ഷേ നോ രക്ഷ…
ബെൽ അടിച്ചതും പെണ്ണ് ബുക്ക് ഒക്കെ എടുത്തു ക്ലാസ്സിൽ നിന്നും പുറത്തേക്ക് ഇറങ്ങി…ഞാൻ അവളോട് സംസാരിക്കാൻ വേഗത്തിൽ പുറത്തേക്ക് ഇറങ്ങി.. പക്ഷെ അവൾ എന്നെ മൈൻഡ് പോലും ചെയ്തില്ല.
ഞാൻ തിരികെ ക്ലാസ്സിലേക്ക് കയറാൻ നിൽക്കുബോൾ മുന്നിൽ നിമ്മി..
ഈശ്വരാ അവളും എന്നെ തന്നെ നോക്കി ചിരിച്ചോണ്ട് നിൽക്കുവാ.
ഞാൻ നിമ്മിയെ നോക്കിയപ്പോൾ അവൾ എന്തെ എന്ന ഭാവത്തിൽ പുരികം ഉയർത്തി ചോദിച്ചോണ്ടു ചിരിച്ചു….
ഞാൻ ഒന്നുമില്ല എന്നർത്ഥത്തിൽ ചുമൽ കൂച്ചി കാണിച്ചു തിരിഞ്ഞപ്പോളാണ് എന്നെയും നിമ്മിയെയും മാറി മാറി തുറിച്ചു നോക്കിക്കൊണ്ട് ക്ലാസിൻ്റെ വെളിയിൽ നിൽക്കുന്ന ജാനിയെ കണ്ടത്….
ഞാൻ ജാനിയേ നോക്കിയപ്പോൾ അവൾ മുഖം വെട്ടിച്ച് ദേഷ്യത്തിൽ ക്ലാസ്സിൽ കേറി ലക്ചർ സ്റ്റാൻഡിലിരുന്ന മൊബൈൽ എടുത്തിട്ട് പുറത്ത് പോയി…
തിരികെ ഇറങ്ങുമ്പോൾ നിമ്മിയെ കൊല്ലാനുള്ള ദേഷ്യത്തിൽ തുറിച്ചു നോക്കുന്നത് ഞാൻ കണ്ടൂ…..ഇപ്പൊൾ ആണേൽ നിമ്മിയേ ഒറ്റക്ക് കിട്ടിയാൽ അരച്ച് കലക്കി കുടിക്കും ജാനി…..എന്നെ കടന്നു പോയപ്പോൾ ഞാനെന്ന ഒരാൾ അവിടെ നിൽക്കുന്നത് പോലും ശ്രദ്ധിക്കാതെയാണ് അവൾ പോയത് ….
പണി പാളുകയാണെന്ന് മനസ്സിലായപ്പോൾ ഞാൻ രഞ്ജുനെയും വിളിച്ചു അവിടുന്ന് ഇറങ്ങി….
ഉച്ച സമയം ആയതുകൊണ്ട് അവൻ എന്നെയും കൊണ്ട് നേരെ പോയത് ക്യാൻ്റീനിലാണ്. രാവിലെ ഒന്നും കഴിച്ചില്ലെങ്കിലും എനിക്ക് ഉച്ചയായിട്ടും തീരെ വിശപ്പ് തോന്നിയില്ല..എൻ്റെ ഊള അളിയൻ നല്ല തട്ട് തട്ടുകയാണ്….എന്നെ കഴിക്കാൻ നിർബന്ധിച്ചെങ്കിലും ഞാൻ കഴിച്ചില്ല…..
അവൻ കഴിച്ചു കഴിഞ്ഞ ഉടൻ ഞാൻ അവനെയും കൊണ്ട് കോളേജിൻ്റെ അടുത്തുള്ള അപ്പാപ്പൻ്റെ കടയിൽ പോയി….
“‘അളിയാ നീ പോയി രണ്ട് കിംഗ്സ് വാങ്ങി വാ”‘….ഞാൻ പൈസ നീട്ടിക്കൊണ്ടു അവനോടു പറഞ്ഞു.
“‘ഡാ ഇത് നമ്മൾ വേണ്ടെന്ന് വെച്ചതല്ലേ പിന്നെന്തിനാ'”….അവൻ പൈസ വാങ്ങാൻ മടിച്ചുകൊണ്ട് എന്നോട് ചോദിച്ചു.
“‘ നീ വാങ്ങി വാ….ഞാൻ പറയാം”‘….
എൻ്റെ മുഖത്തെ ടെൻഷനും ഗൗരവവും കണ്ടത് കൊണ്ടായിരിക്കാം പിന്നെ അവൻ ഒന്നും ചോദിക്കാൻ തുനിയാതെ സാധനം വാങ്ങാൻ പോയി.
”ഇന്നാ….പക്ഷേ ഇത് വീണ്ടും തുടങ്ങാനുള്ള കാര്യം എനിക്ക് അറിയണം….”
അവൻ ഒരെണ്ണം എൻ്റെ നേരെ നീട്ടിക്കൊണ്ട് പറഞ്ഞു….
അവൻ്റെ കൈയിൽ നിന്നത് വാങ്ങിയത് കത്തിച്ചിട്ട് ശ്വാസം വലിച്ചെടുത്ത്.. പുക ശ്വാസകോശത്തിൽ നിറയുമ്പോൾ എൻ്റെ മനസ്സ് വിഷമം കൊണ്ട് നിറഞ്ഞു….പിന്നെ ഒരു പുക കൂടി വലിച്ചെടുത്തിട്ട് നടന്ന കാര്യങ്ങൾ മുഴുവനും ഞാൻ അവനോടു പറഞ്ഞു.
കാര്യങ്ങളെല്ലാം കേട്ടപ്പോൾ അവൻ പൊട്ടിച്ചിരിക്കാൻ തുടങ്ങി..അവൻ്റെ ചിരി കണ്ടപ്പോൾ എൻ്റെ ടെമ്പെറു തെറ്റാനും…..
“‘നിർത്തട നാറി.. നിൻ്റെ കൊലച്ചിരി….. ഇവിടെ മനുഷ്യൻ്റെ സമാധാനം പോയി നിൽക്കുമ്പോളാണ് അവൻ്റെ മറ്റെടത്തെ ചിരി”‘..അവൻ്റെ ആക്കിയുള്ള ചിരി പിടിക്കാതെ ഞാൻ പറഞ്ഞു.
“‘പിന്നെ വഴിക്കൂടെ പോയ ഏണി എടുത്ത് തോളിൽ വെച്ചിട്ട് നിന്ന് മോങ്ങിയിട്ട് എന്ത് കാര്യം….അല്ല ഞാനൊരു കാര്യം ചോദിക്കട്ടെ….നിനക്ക് ആ നിമ്മിയെ ഇഷ്ടമാണോ… അങ്ങനെയാണെങ്കിൽ നിനക്ക് എങ്ങനെ മനസ്സ് വന്നടാ എന്റെ പാവം ചേച്ചിയെ പറ്റിക്കാൻ”‘….
“‘ഡാ ഞാൻ…..നിനക്ക് അറിയാതെ എന്തേലും കാര്യം എൻ്റെ മനസ്സിൽ ഉണ്ടോ….ഞാൻ അവളെ പറ്റിക്കാൻ വേണ്ടിയാ നിമ്മിയുടെ കാര്യം പറഞ്ഞത്. പക്ഷേ അവളെ അത് ഇത്രയും വേദനിപ്പിക്കുമെന്ന് ഞാൻ കരുതിയില്ല… ഇപ്പൊ അവള് എന്നെയൊന്നു മൈൻഡ് കൂടി ചെയ്യുന്നില്ല.. പെണ്ണ് ഫുൾ കലിപ്പാ..!”‘….
“‘നിനക്ക് അവൾടെ സ്വഭാവം അറിയല്ലേ….. അവൾടെ ഒരു പാവപോലും വേറൊരാൾ ഉപയോഗിക്കുന്നത് അവൾക്ക് ഇഷ്ടമല്ല… അപ്പൊ നിന്നെ ജീവനെ പോലെ സ്നേഹിക്കുന്ന അവളോട് നീ നിനക്ക് വേറോരുതിയോട് ഇഷ്ടം ഉണ്ടെന്ന് പറയുമ്പോ അവൾക്ക് എന്തു മാത്രം ദേഷ്യം ഉണ്ടാവും.. അവളെന്തോരം വിഷമിക്കുന്നുണ്ടാവും.. അച്ഛനും അമ്മയും പോലും അവളെക്കാൾ എന്നോട് കൂടുതൽ ഇഷ്ടം കാണിച്ചാൽ അവളാ വീട് തലകുത്തനെ നിർത്തും ..എത്ര വട്ടം ഈ പേരും പറഞ്ഞു ഞങ്ങൾ അടികൂടിയേക്കുന്ന്….ഇതെല്ലാം അറിയുന്ന നീ അവളോട് ഇങ്ങനെയൊന്നും പറയണ്ടായിരുന്നു”.
“‘ഡാ ഇതെല്ലാം അറിയാം. പക്ഷേ അന്നരം ഒരു തമാശക്ക് ഒപ്പിച്ചു പിന്നെ ഇന്ന് രാവിലത്തെ അവൾടെ ആറ്റിട്ടുട് കണ്ടപ്പോൾ കൈയിന്ന് പോയി… എന്തായാലും നടന്നു..എൻ്റെ പൊന്നളിയൻ അല്ലേ….ഒന്ന് അവളോട് പറഞ്ഞു എല്ലാം സെറ്റിലാക്കി താ”‘….
“‘എനിക്കൊന്നും വയ്യാ….നീ നിൻ്റെ പണി നോക്കി പോയെ….ഈ കാര്യം പറഞ്ഞോണ്ട് ഞാൻ അവൾടെ അടുത്ത് ചെന്നാ എന്നെയും എടുത്ത് ഭിത്തിയിൽ ഒട്ടിക്കും….പിന്നെ ഒരു കാര്യം കൂടി….നീ എന്തിനാ നിമ്മിയോടു രണ്ടു മാസം മുന്നേ നീ പറഞ്ഞിരുന്നെങ്കിൽ എന്ന് പറഞ്ഞെ”‘….
“‘ഡാ അത്….വെറുതെ പറഞ്ഞതാ… അവളെ ഒന്ന് സുഖിപ്പിക്കാൻ‘….
‘മ്മ്…….എന്നിട്ട് ആരായിപ്പോ സുഖിക്കുന്നെ…?”
“അളിയാ ശവത്തീകുത്തല്ലെടാ “
“ഹമ്മ് ….ശരി.. ശരി….ഞാൻ ഒന്നു ചേച്ചിയോട് പറഞ്ഞു നോക്കാം.. നടന്നാൽ നടന്നു”….
രഞ്ജു ഉറപ്പില്ലാതെ പറഞ്ഞു.
“ഡാ അങ്ങനെ പറയല്ലേ….നിന്നെ കൊണ്ടേ പറ്റൂ….. പ്ലീസ് ഡാ”
“മ്മ്മ…ഞാൻ ഒന്ന് ശ്രമിച്ചു നോക്കാം”….
“അതു മതി….നീ വിചാരിച്ചാൽ നടക്കും”‘…
“കൂടുതൽ സുഖിപ്പിക്കാതെ…..നടക്ക് അങ്ങോട്ട് “….
ഞങ്ങൾ കോളേജിലേക്ക് നടക്കുന്നതിന്റെ ഇടയിൽ രഞ്ജു എൻ്റെ നേരെ ഒരു സെൻ്റർ ഫ്രഷ് നീട്ടി.
“‘ഇന്നാ ഇത് മുണുങ്ങ്….ഇനി അതിൻ്റെ മണം കിട്ടി മാട്ട് അതിൻ്റെ പേരിൽ ഒരു അടി കൂടി വേണ്ട”…..
അവൻ പറഞ്ഞതും സത്യമാണ്..സിഗററ്റിൻ്റെ മണം കിട്ടിയാൽ അവൾ എന്നെ കോളെജിൽ ഇട്ട് അടിക്കും….
കോളേജിൽ എത്തി ഇനി അടുത്ത പിരിയഡ് തൊടങ്ങാൻ 10 മിനിറ്റ് കൂടി ഉണ്ട്….വെറുതെ പുറത്ത് കിടന്നു കറങ്ങി അവൾടെ മുമ്പിൽ ചാടണ്ടാന്ന് വെച്ച് ഞങ്ങൾ നേരെ ക്ലാസിലോട്ട് നടന്നു….
സ്റ്റാഫ് റൂം കഴിഞ്ഞാണ് ക്ലാസ്സ്…ക്ലാസ്സിൽ കയറാൻ അതല്ലാതെ വേറെ വഴിയും ഇല്ല…..എന്തായാലും ഈ സമയത്ത് ജാനി പുറത്ത് ഇറങ്ങില്ലെന്ന വിശ്വാസത്തിൽ ഞങ്ങൾ സ്റ്റാഫ് റൂമിൻ്റെ മുന്നിൽ കൂടി നടന്നു….
എൻ്റെ നല്ല സമയം ആയതുകൊണ്ട് സ്റ്റാഫ് റൂം എത്തുന്നതിനു മുന്നേ ജാനി അവിടുന്ന് ഇറങ്ങി ഞങ്ങളുടെ നേരെ നടന്നു വന്നു…..
“‘ഡാ ദേവാ….നമ്മൾ പെട്ടു”‘…. രഞ്ജു ജാങ്കോ സ്റ്റൈലിൽ പറഞ്ഞു.
“‘നീ ഒന്ന് മിണ്ടാതിരി…..അവള് പാസ്സ് ചെയ്ത് പൊന്നവരെ മിണ്ടരുത്…..ശ്വാസവും വിടരുത്”….
“‘മ്മ്മ….ഞാൻ ശ്വാസം മുട്ടി ചത്ത് പോയാലാ”‘….
“‘എങ്കി ഞാനൊരു കൂഴി എടുത്ത് നിന്നെ അതിലിട്ട് മൂടും…..മിണ്ടാതെ വാടാ പന്നി”‘….
“‘ഓ ശെരി തമ്പ്ര”‘….
ജാനി ഞങ്ങൾക്ക് എതിര് വെരുന്നെങ്കിലും ഞങ്ങൾ ഒപ്പോസിറ്റു വരുന്ന ഒരു ഭാവവുമാല്ല…..തല താഴ്ത്തി നടന്നുവരുവാണ്…
ജാനി എൻ്റെ അടുത്തൂടെ പോയപ്പോൾ ശ്വാസം വലിച്ച് എടുക്കുന്ന ശബ്ദം കേട്ട്….
“‘ജാങ്കൊ നീ പെട്ടു”‘..ആരോ പറയുന്ന പോലെ തോന്നി.
പിടിക്കപ്പെട്ടോ ഇല്ലയോ എന്ന് അറിയാതെ ഒരു ഭാവവും വരുത്താതെ ഞങ്ങൾ നടന്നു…. റിയാക്ഷൻ ഒന്നുമില്ലാത്തോണ്ട് രക്ഷപെട്ടെന്ന് ആശ്വസിച്ചു.
“‘ഡാ മണം കിട്ടിയില്ലെന്ന് തോന്നുന്നു “‘….. രഞ്ജു എന്നോട് പറഞ്ഞു നിർത്തിയതും
“‘പടോ”‘….എന്നൊരു ശബ്ദം….ഒപ്പം “‘ആ”‘എന്റെ നിലവിളിയും.
അവളുടെ കലക്കൻ ഇടി അതും എന്റെ മുതിവിന്… ഞാൻ മുതിവിന് കൈ വെച്ച് കരഞ്ഞു പോയി.
തിരിഞ്ഞ് നോക്കിയപ്പോൾ ഞാനൊന്നും അറിഞ്ഞില്ലേ രാമരാമായണ എന്ന ഭാവത്തിൽ ജാനി നടന്നുപോകുന്നു…..
“‘അളിയാ അവൾക്ക് മണം കിട്ടി”‘…..ഞാൻ പുറവും തടവികൊണ്ട് പറഞ്ഞു.
“‘അതു മനസിലായി…..പിന്നെ നിങ്ങൾ തമ്മിലുള്ള എല്ലാം നിങ്ങൾ തമ്മിൽ പറഞ്ഞു തീർത്താമതി…എന്നെ ഇതിൽ വലിച്ചിടണ്ടാ”‘….
ഇത്രയും പറഞ്ഞിട്ട് രഞ്ജു സ്പീഡിൽ നടന്നു ക്ലാസ്സിൽ കേറി…..
പിന്നീടുള്ള ക്ലാസ്സുകൾ പെട്ടെന്ന് പോയി..എൻ്റെ മനസ്സ് നൂല് പൊട്ടിയ പട്ടം പോലെ പറന്നു നടന്നു.. അധ്യാപകർ പഠിപ്പിച്ചതോന്നും കേട്ടില്ല..ഇടക്ക് ഇടക്ക് ഒളി കണ്ണിട്ടു എന്നെ നോക്കി പുഞ്ചിരിക്കുന്ന നിമ്മിയേ കണ്ടൂ.. അവൾട ചാട്ടം എങ്ങോട്ടാണെന്ന് മനസ്സിലായത് കൊണ്ട് ഞാൻ മൈൻഡ് ചെയ്യാൻ പോയില്ല.
ക്ലാസ്സ് എല്ലാം കഴിഞ്ഞു വൈകിട്ട് പാർക്കിങ്ങിൻ്റെ അവിടെ ജാനിയെ സോപ്പിടാനുള്ള വഴികളും ആലോചിച്ചു ഞാനും എൻ്റെ അളിയനും ഇരിക്കുവായിരുന്ന്….ഞാൻ എൻ്റെ ഹിമാലയൻ്റെ മുകളിലും രഞ്ജു ജാനിയുടെ ഡിയോയുടെ പുറത്തും….
“‘ഡാ അളിയാ എന്തേലും ഒരു വഴി ഒപ്പിച്ചു താ”‘..ഞാൻ രഞ്ജുനോടു പറഞ്ഞു.
“‘എനിക്കൊന്നും വയ്യ….ഇനി നിന്നെ സപ്പോർട്ട് ചെയ്തു അങ്ങോട്ട് ചെന്നാൽ നേരത്തെ നിൻ്റെ പുറത്ത് കിട്ടിയതിൻ്റെ ബാക്കി എനിക്കും കിട്ടും..നമ്മളെ വിട്ടേരടൈ.. നിങ്ങള് ഭാര്യയും ഭർത്താവും എന്തോ ആയിക്കോ നമ്മള് പാവങ്ങള്”‘.
“‘നൈസ് ആയിട്ട് ഒഴിവാക്കുവാണോ സജി”‘..അവൻ മറുപടി പറയുന്നതിന് മുന്നേ ഞങ്ങളുടെ മുന്നിൽ നിമ്മി പ്രത്യക്ഷപ്പെട്ടു….
“‘ഇതെന്തുവാ അളിയനും അളിയനും ഭയങ്കര ചർച്ചയിൽ ആണോ”‘..നിമ്മി ഞങ്ങളെ നോക്കി ചോദിച്ചു.
“”ഇന്ന് ഇനി ചെന്നിട്ട് ഏത് രാജ്യത്ത് പോണമെന്ന് ആലോചിക്കുവായിരുന്ന്”‘.. രഞ്ജു അവളെനോക്കി പറഞ്ഞു.
“‘കളിയാക്കാത ചെക്കാ”‘….എന്നും പറഞ്ഞുകൊണ്ട് നിമ്മി എൻ്റെ ബൈക്കിൻ്റെ ബാക്കിൽ വലിഞ്ഞുകേറി.
പെട്ടെന്ന് വണ്ടിയിൽ ചാടിക്കേറിയപ്പോൾ എൻ്റെ ബാലൻസ് തെറ്റി വണ്ടി ചെറുതായിട്ട് ഒന്ന് ചരിഞ്ഞു.
“‘കൊല്ലാൻ നൊക്കുവാണോ നീ “‘….
ഞാൻ വണ്ടി ബാലൻസ് ചെയ്ത് കൊണ്ട് തിരിഞ്ഞ് നോക്കി ചോദിച്ചു..
അമിളി പറ്റിയ രീതിയിൽ മുഖവും വെച്ച് നാക്കും കടിച്ചു കാണിച്ചിട്ട് നിമ്മി എന്നോടു പറഞ്ഞു.
“‘അതെ വണ്ടി വർക്ക്ഷോപ്പിലാണ്. കിട്ടിയില്ല….എന്നെ ഒന്ന് സ്റ്റാൻഡ് വെരെ ആക്കുമോ”‘..
അവള് കുട്ടികളെപ്പോലെ കൊഞ്ചിക്കൊണ്ട് ചോദിച്ചു .
“‘നിനക്ക് നിൻ്റെ ഏതേലും ഫ്രണ്ടിൻ്റെ വണ്ടിയിൽ പോയിക്കുടെ…..എൻ്റെ പുറകെ കേറുന്നത് എന്തിനാ”‘….
“‘നീയും എൻ്റെ ഫ്രണ്ടല്ലെ…നീയല്ലേ പറഞ്ഞെ നമ്മക്ക് ഫ്രണ്ട്സ് ആകാമെന്ന്.. എന്നിട്ട് ഇപ്പൊൾ ഒരു ലിഫ്റ്റ്പോലും തരില്ലേ”‘…..
‘”ഓഹ് ശെരി ഒരു ലിഫ്റ്റ് അല്ലേ വേണ്ടേ…..അളിയാ ഡാ ഇവളെ ഒന്ന് സ്റ്റാൻഡിലാക്ക്”‘…..ഞാൻ വണ്ടിയിൽ നിന്നും ഇറങ്ങാൻ പോയി.
“‘അതൊന്നും വേണ്ട….എന്നെ നീ കൊണ്ടാക്കിയ മതി”‘..
നിമ്മി വാശിയോടെ പറഞ്ഞു.
“‘ഏയ്….അതൊന്നും ശെരിയാവില്ല ….നിന്നെ അവൻ ആക്കി തരും”‘…..ഞാൻ പെട്ടെന്ന് പറഞ്ഞു.
“‘ഇല്ല….എന്നെ നീ തന്നെ ആക്കി തന്നാ മതി….ഇന്നലെ ആക്കിയപ്പോൾ കൊഴപ്പമൊന്നില്ലായിരുന്നല്ലോ.. പിന്നെ ഇപ്പൊൾ എന്നാ….പിന്നെ നീ എന്നെ കൂടെ കൊണ്ട് പോകാൻ പേടിക്കുന്നുണ്ടെങ്കിൽ അതിനർത്ഥം നിനക്ക് എന്നോടുള്ള ഇഷ്ടം പുറത്ത് വരുമോന്ന് പേടിച്ചിട്ടല്ലെ…..അത് കൊഴപ്പമില്ല…. ബാ വണ്ടിയെട്…..എന്നെ നീ ആക്കാതെ ഞാൻ ഈ കുതിരയിൽ നിന്ന് ഇറങ്ങില്ല”‘..
അവൾ കുട്ടികൾ വാശിപിടിക്കുന്നത് പോലെ പറഞ്ഞു വണ്ടിയിൽ തന്നെ ഇരുന്നു…..
വേറെ നിവർത്തിയില്ലാതെ ഞാൻ വണ്ടി സ്റ്റാർട്ട് ചെയ്തിട്ട് രഞ്ജുനെ നോക്കി പറഞ്ഞു.
“‘അളിയാ ഞാൻ ഇവളെ ആക്കിയിട്ടു വരാം”‘…..
ഞാൻ അവനെ നോക്കി ദയനീയമായി പറഞ്ഞു.
“‘ഓ അളിയാ….ഇന്നും തലക്കണി തന്നെ”‘….അവൻ എന്നെ ആക്കികൊണ്ട് പറഞ്ഞു.
“‘ഈ ചെക്കനിന്ന് എന്താ ഒരു ബന്ധവും ഇല്ലാതെ കാര്യം പറയുന്നത്”‘….
രഞ്ജു പറഞ്ഞത് മനസ്സിലാവാതെ നിമ്മി പറഞ്ഞു.
ഞാൻ അതിന് മറുപടിയൊന്നും പറയാതെ ബൈക്ക് തിരിച്ചു….വണ്ടി നേരെ നിർത്തിയപ്പോളാണ് ഞങ്ങളെ തന്നെ നോക്കി നിൽക്കുന്ന ജാനിയെ ഞാൻ കണ്ടത്.. ആ കറക്റ്റ് ടൈമിൽ തന്നെ നിമ്മി എൻ്റെ വയിറ്റിലുടെ രണ്ടു കയ്യും ഇറുക്കി ചുറ്റിയിട്ട് താടി എൻ്റെ തോളിലും വെച്ച്….
നിമ്മിയുടെ ഈ പ്രവർത്തി എൻ്റെ ശവപ്പെട്ടിയുടെ അവസാനത്തെ ആണിയായി…..ഇനി വീട്ടിൽ ചെല്ലുമ്പോൾ ജാനി തന്നെ കുഴിയിലോട്ട് വെച്ചിട്ട് മണ്ണിട്ട് മൂടിക്കൊള്ളും ….
“‘മ്മ്….വണ്ടി പോട്ടെ റൈറ്റ്”‘…
..നിമ്മി ബാക്കിലുരുന്ന് പറയുന്നുണ്ട്.
ഞാൻ യന്ത്രത്തെ പോലെ വണ്ടി മുന്നോട്ട് എടുത്തു….. ജാനിയെ പാസ്സ് ചെയ്യുന്നവരെ ഞങ്ങളെ തന്നെ തുറിച്ചു നോക്കി നിൽക്കുവായിരുന്നു ജാനി…..
അവളെ പാസ്സ് ചെയ്തിട്ട് മിററിൽ കൂടി നോക്കിയപ്പോഴും ഞങ്ങളെ തന്നെ നോക്കി നിൽക്കുവാണ് കക്ഷി. …
വണ്ടിയിൽ ഇരുന്ന് നിമ്മി എന്തൊക്കെയോ പറഞ്ഞു പക്ഷേ ഞാൻ ഒന്നും കേട്ടില്ല….. നിമ്മിയെ സ്റ്റാൻഡിൽ ഇറക്കിയപ്പോഴും എന്തൊക്കെയോ പറഞ്ഞു…..തിരിച്ചു കോളേജിൽ പോകുന്ന വഴിയെയും എൻ്റെ ചിന്ത ഇന്ന് ഇനി എങ്ങനെ ജാനിയെ കാര്യങ്ങളൊക്കെ പറഞ്ഞു മനസിലാക്കുമെന്നായിരുന്നു . [ തുടരും ]