ഞാൻ കാർ അവളുടെ കോളേജിന് മുന്നിൽ നിർത്തി. എന്നിട്ടും അവൾ പുറത്തിറങ്ങാതെ വെളിയിലേക്ക് തന്നെ നോക്കിയിരിക്കുകയായിരുന്നു.

“ കുട്ടാ കോളേജ് എത്തി ഇറങ്ങുന്നില്ലേ.”

“ ങേ …’ അവൾ സ്വപ്നത്തിൽ നിന്നെന്നോണം ഞെട്ടിയുണർന്ന് ചുറ്റും നോക്കി.
എന്നോട്ട് ഒന്നും മിണ്ടാതെ ഡോർ തുറന്നിറങ്ങിപ്പോയി.
ഞാൻ എന്തു ചെയ്യണം എന്നറിയാതെ അവൾ പോകുന്നതും നോക്കി നിന്നു.

അവൾ നടക്കുമ്പോഴും കാര്യമായി ആലോചിക്കുന്നുണ്ടായിരുന്നു.
സ്കൂൾ ഗേറ്റ് കടക്കുന്നതിന് മുൻ അവൾ ഒന്ന് തിരിഞ്ഞ് നോക്കി
ഞാൻ പോയൊ എന്ന് നോക്കിയതായിരിക്കും. ഞാൻ അവിടെ കാണുമെന്ന് അവൾ പ്രതീക്ഷിച്ചില്ലായിരുന്നു എന്ന് തോന്നുന്നു.

എന്നെ കണ്ടതും അവളുടെ മുഖം ഒന്ന് വികസിക്കുന്നത് കണ്ടു.
എനിക്ക് കുറച്ചാശ്വാസമായി. അവൾ എനിക്ക് ഒരു റ്റാറ്റ തന്നിട്ട് തിരിഞ്ഞ് നടന്നു.
ഞാൻ അറിയാതെ എന്റെ കൈയ്യും പൊക്കി റ്റാറ്റ കാണിച്ചു.
അവൾ അതു കണ്ടോ എന്നറിയില്ല. പിറകിൽ എതോ ഒരുവന്റെ നിർത്താതെയുള്ള ഹോൺ അടി കേട്ടാണ് എനിക്ക് പരിസരബോധമുണ്ടായത്.

ഞാൻ ഗിയർ മാറി കാർ മുന്നോട്ടെടുത്തു.
പോകുന്നതിന് മുൻപ് ഞാൻ ഒന്നും കൂടി ഗേറ്റിലേക്ക് നോക്കി.
അപ്പോഴേക്കും അവൾ പോയ്കഴിഞ്ഞിരുന്നു.

ഓഫീസിൽ എത്തിയതും അതുവരെയുണ്ടായിരുന്ന പിരിമുറുക്കം മൊത്തം അയഞ്ഞു. എന്നത്തെയും പോലെ തിരക്ക് പിടിച്ച ഒരു ദിവസമായിരുന്നു അന്നും.
പക്ഷേ ഒന്നിലും ഒരു ശ്രദ്ധ കിട്ടുന്നില്ല. മനസ് കൈയ്യിൽ നിന്നും വഴുതിപ്പോകുന്നു. പിടിച്ചെടത്ത് നിൽക്കുന്നില്ല. എപ്പോഴും അവളുടെ മുഖമാണ് മനസിൽ വരുന്നത്. എങ്ങെനെയോ ഞാൻ അന്നത്തെ ദിവസം കഴിച്ച് കൂട്ടി. സാധാരണ എല്ലാവരും പോയ്ക്കഴിഞ്ഞാണ് ഞാൻ ഇറങ്ങുന്നത്. ഇന്ന് എല്ലാവരെക്കാളും മുൻപേ ഞാൻ ഇറങ്ങി.