സെലീന ആന്തലോടെ തിരക്കി.

ഒന്നും പോയിട്ടില്ലായിരുന്നു.. പോലീസിലൊക്കെ പറഞ്ഞിട്ടുണ്ട്.. വണ്ടീടെ നമ്പരൊക്കെ വേറേയാണന്നാ കേട്ടത്… എന്തായാലും ശൗരിയുടെയൊക്കെ സമയം.. ഇനിയിപ്പോ നാട്ടിലൊന്നു വിലസാമല്ലോ !!

അങ്കിളിനോടാരാ ഇതു പറഞ്ഞെ..

ഞാന്‍ ഊണു കഴിക്കാന്‍ കാളച്ചന്തേലെ ഹോട്ടലില്‍ പോയിരുന്നു.. അവിടുന്ന് കിട്ടിയ വിവരമാ..

തമ്പാന്‍ നടന്നുപോയി..

സെലീനയ്ക്ക് മനസ്സിനു വല്ലാത്തൊരു കുളിര്‍മ്മ തോന്നി..

അല്ലേലും അവനൊരു പോക്കിരി തന്നെയാ.. ശൗരി.. അവന്‍റെ വാലേല്‍ കെട്ടാന്‍ കൊള്ളത്തില്ല ഇവിടുത്തെ അവന്മാരെ..!!

വിന്‍സി ഒട്ടും കുറയ്ക്കാതെ ശൗരിയെ പുകഴ്ത്തി. സെലീന ഒന്നു മന്ദഹസിച്ചു..

വിന്‍സിക്ക് ശൗരിയെ അടുത്തിടയായി വല്ല്യ കാര്യമാണ്.. അവളങ്ങനെ അധികം ആരോടും കൂട്ടുകൂടുന്ന ടൈപ്പല്ല.. തന്നോടു പോലും ഈയടുത്തിടയ്ക്കാണു മര്യാദയ്ക്ക് ഒന്നു മിണ്ടാന്‍ തുടങ്ങിയത്.. അതും താന്‍ അങ്ങോട്ട് ഇടിച്ചു കയറി മിണ്ടിയിട്ട്..

എന്താ വിന്‍സീ ഈയ്യിടെയായിട്ട് ശൗരിയെക്കാണുമ്പോ ഒരിത്..

സെലീന ചെറുചിരിയോടെ തിരക്കി..

പോടീ അവിടുന്ന്.. എനിക്ക് പ്രേമോം മണ്ണാങ്കട്ടേമൊന്നുമില്ല.. പക്ഷേ അവനെപ്പോലെ ഒരാളാകണമെന്നാ എന്‍റെ ആഗ്രഹം..

ആ പറഞ്ഞത് സെലീനയ്ക്ക് മനസ്സിലായില്ല…

വിന്‍സിക്ക് ആണുങ്ങളോട് ഒരു കമ്പമുള്ളപോലെ തോന്നിയിട്ടുണ്ട്. അതു പക്ഷേ പ്രേമമൊന്നുമല്ല..