എന്റെ കാര്യം ഒന്നുമായിട്ടില്ല.. പഠിപ്പു പാതിവഴിയിൽ ഉപേക്ഷിച്ചു നടക്കുന്ന ഒരു ഉഴപ്പൻ. പഠനത്തിനോടൊന്നും എനിക്ക് താത്പര്യമുണ്ടായിരുന്നില്ല. താല്പര്യമുണ്ടായിരുന്നത് ഫിലിം ഫീൽഡ് ആയിരുന്നു. അതിനൊട്ട് വീട്ടിൽ നിന്ന് വിടുകയുമില്ല. പിന്നെ ഒരു ബിസിനസ്‌ തുടങ്ങണമെന്നുണ്ടാർന്നു. പക്ഷെ അതിനിപ്പോ അപ്പച്ചൻ ക്യാഷ്ഉം തരുന്നില്ല.

ഒരു പഠിപ്പിസ്റ്റ് കുടുംബത്തിൽ വന്ന് പെട്ട ഹതഭാഗ്യവാനായ ഉഴപ്പനായിരുന്നു ഞാൻ.

ഏട്ടനും അനിയത്തിയും പുസ്തക പുഴുക്കളായിരുന്നു. അതുകൊണ്ട് തന്നെ എല്ലാവർക്കും അവരെക്കുറിച്ചു നല്ല മതിപ്പായിരുന്നു. പോരാത്തതിന് ഏട്ടൻ വിവാഹം ചെയ്തതും ഒരു പഠിപ്പിസ്റ്റിനെതന്നെ.

റിൻസി ചേച്ചിയും കൂടി വീട്ടിലെത്തിയതോടെ എന്നോടുള്ള പുച്ഛം എല്ലാവർക്കും കൂടി.

ചെറുപ്പം മുതലേ തന്നെ വീട്ടുകാരുടെ കണ്ണിൽ കരട് ഞാനായിരുന്നു. ഭാഗ്യത്തിന് ഏട്ടൻ വീട്ടിൽ നിന്ന് ചെന്നൈയിലേക്ക് പോയതോടെ ഒരു പാര പോയി കിട്ടി. റിൻസി ചേച്ചിക്ക് ഇവിടെ എന്തോ ജോലി തരപ്പെട്ടിട്ടുണ്ട്, അല്ലെങ്കിൽ ആ പാര കൂടി ഏട്ടന്റെ ഒപ്പം പോയാനെ.

പിന്നെ ഉള്ള അനിയത്തി ജെസ്‌ന, ഓഹ് ഇപ്പോളത്തെ മെയിൻ പാര അവളാണ്. വീട്ടിലെ പുന്നാര പുത്രിയല്ലേ. കൂടാത്തതിന് പഠിച്ച സ്കൂളിൽ എല്ലാം ഒന്നമായതായോടെ അപ്പച്ഛന്റേം അമ്മച്ചിയുടേം കണ്ണിലുണ്ണി.