രാത്രി ഭക്ഷണം കഴിക്കാൻ ഡൈനിങ് ടേബിളിൽ ഇരിക്കുവാണെന്നൊന്നും നോക്കാതെ അപ്പച്ചൻ എന്നെ വലിച്ച് കീറി. അമ്മച്ചി അതങ്ങു ഭിത്തിയിൽ ഒട്ടിച്ചു, അനിയത്തിയായ ജെസ്‌ന അതുവീണ്ടും ചുരണ്ടിയെടുത്തു.

ഏട്ടത്തിയായ റിൻസിയും അവരുടെ അനിയത്തി നാൻസിയും ചേർന്ന് വീണ്ടും ഭിത്തിയിൽ ഒട്ടിക്കും.

നാണംകെട്ടു ചോറ് വാരിതിന്ന് പോവുന്ന വരെ ഈ കലാപരിപാടി തുടർന്നുകൊണ്ടേയിരിക്കും.

“അല്ലേലും എല്ലാ വീട്ടിലും കാണുമല്ലോ ഇത് പോലെ ഒരെണ്ണം… മനുഷ്യനെ നാണം കെടുത്താനായിട്ട് ”

“ഒന്നും പറയണ്ട അപ്പച്ചാ, മരിയ വിളിച്ചു എന്നോട് പറഞ്ഞത് കേട്ടാൽ നമ്മുടെ തൊലി ഉലിഞ്ഞു പോവും “

ജെസ്‌ന പതിവ് പോലെ എരിവ് ചേർത്തു.

“അല്ലേലും ഇവന് ഒരു പണിയും ഇല്ലാത്തതിന്റെ ഏനക്കേടാ “

റിൻസി ചേച്ചി കുറ്റപ്പെടുത്തി.

“പണി ഇല്ലാത്ത കാര്യം എന്നെക്കൊണ്ട് പറയിപ്പിക്കരുത്. പത്താം ക്‌ളാസും ഗുസ്തിയുമായി നടക്കണവന് ആര് പണി കൊടുക്കാനാ ”

അമ്മച്ചി എന്നെ നോക്കി പുച്ഛിച്ചു.

“ഞാൻ പത്താം ക്ലാസ്സ് ഒന്നുമല്ല, പ്ലസ് ടു കഴിഞ്ഞില്ലേ? “

ഞാൻ പ്രതിഷേധിച്ചു.

“നാണമില്ലെടാ നിനക്ക്? എൻട്രൻസ് എഴുതി കിട്ടാഞ്ഞതും പോരാ ക്യാഷ് കൊടുത്തു എഞ്ചിനീയറിംഗ്ന് ചേർത്ത്. അത് പറ്റണില്ല എന്ന് പറഞ്ഞു പകുതിക്കു ഇട്ടേച്ചും പോന്നപ്പോൾ വീണ്ടും ക്യാഷ് മുടക്കി കൊണ്ടോയി എംബിഎയ്ക്ക് ചേർത്തു. ദേ അപ്പൊ അതും ഉപേക്ഷിച്ചു പോന്നേക്കുന്നു കഴുതേട മോൻ “