സ്വപ്നം – അവൾ ഒന്നും മിണ്ടാതെ കേറിപ്പോയി,

വീരന് ഞാൻ വാങ്ങിക്കൊടുത്ത ഡ്രസ്സ് ഇടീച്ചോണ്ട് വന്നു.. അത് വളരെ വലുതാരുന്നു. 1000 രൂപ മനസ്സിൽ വെച്ചു ഡ്രസ്സ്‌ എടുത്തപ്പോൾ കൊച്ചിന്റെ പ്രായം ഞാൻ കണക്കിലെടുത്തില്ല.

“കുട്ടികൾക്ക് തുണി മേടിക്കുമ്പോൾ പ്രായം കൂടെ പറഞ്ഞു വേണം തുണി എടുക്കാൻ”

അര്യേച്ചിയുടെ കമന്റ് ഞാൻ കേട്ട ഭാവം നടിച്ചില്ലെങ്കിലും ഞാനാകെ ചമ്മി..

“ഞാനും അദ്ധ്വാനിച്ച പൈസകൊണ്ട് മേടിച്ചു തന്നതാ നിനക്കാ ഡ്രസ്സ് , എല്ലാർക്കും ആഗ്രഹമുണ്ട് അതൊക്കെ ഒന്ന് ഇട്ട് കാണണമെന്ന് ”
അവള്‍ പറഞ്ഞു.

അപ്പൊഴാണ് ഞാൻ അതോർക്കുന്നത്..

“അത്രേം വിലയുള്ളതൊന്നും എനിക്ക് ചേരില്ലടോ”

“ഇട്ട് നോക്കിയാലല്ലേ അറിയൂ…”
അവള്‍ പറഞ്ഞു

“ഇല്ല, ഞാൻ ചേച്ചിയോട് ആയോണ്ട് പറയാം എന്റെ ബാങ്കിൽ ആകെ ഉള്ള സേവിംങ്ങ്സ് ഇനി 16 ചില്ലറയാണ്.. ചേച്ചി എനിക്ക് വാങ്ങി വെച്ചത് എല്ലാം കൂടെ 10000നു മുകളിൽ വരും.. അതുകൊണ്ട് എനിക്കത് സ്വീകരിക്കാൻ ബുദ്ധിമുട്ടുണ്ട്.”

“Ok.. അതിങ്ങ് എടുത്തേക്ക് ”
അവള്‍ കൈ നീട്ടി

ഞാൻ എല്ലാം എടുത്തു അവളുടെ കയ്യിൽ കൊടുത്തു.

പിറ്റേന്ന് രാത്രി എനിക്ക് കൊറച്ചു ഷർട്ടും പാൻസും തന്നു. ഇപ്രാവശ്യം 300-350 റേഞ്ചിലുള്ളതാണെന്ന് സ്റ്റിക്കർ കണ്ടപ്പോൾ മനസിലായി. റൂമിൽ ചെന്നു ഇട്ട് നോക്കിയപ്പോൾ എല്ലാം നല്ല ഉഗ്രൻ സെലക്ഷൻ.. ഞാൻ ഓരോന്നും ഇട്ട് അവളെക്കൊണ്ട് കാണിച്ചു.

അവളുടെ മുഖം അപ്പൊ ഒന്നു കാണേണ്ടതാരുന്നു.
അതിൽ ഒന്നിന്റെ അകത്തെ പോക്കറ്റിൽ ഒരു സ്റ്റിക്കർ കണ്ടു 2800. എന്നെ വിദഗ്ദമായി പറ്റിച്ചു എന്ന് മനസിലായി. ഇന്നലെ കൊണ്ടോയ അതേ തുണി സ്റ്റിക്കർ മാറ്റി ഒട്ടിച്ചുതന്നു. എങ്കിലും അത് ഇട്ട് ചെന്നപ്പോഴുള്ള അവളുടെ സന്തോഷം കണ്ടപ്പോൾ അത് തിരിച്ചു കൊടുക്കാൻ തോന്നിയില്ല. ഞാൻ അറിഞ്ഞോണ്ട് പൊട്ടനായി. എവിടേയോ ഒരു സ്നേഹം എന്റെ ഉള്ളിൽ നാമ്പിട്ടു.

പിറ്റേന്ന് ഞാൻ കടയിൽ നിന്ന് വന്നപ്പോഴേക്കും അമ്മ നാട്ടിൽനിന്ന് വന്നിരുന്നു. ഞാൻ മൈന്റ് ചെയ്യാതെ എന്റെ റൂമിൽ പോയി. ഇത്രയും ദിവസം സ്വന്തം മോനേ കാണാൻ വരാഞ്ഞ അമ്മയെ എന്റെ പ്രതിഷേധം അറിയിക്കുക എന്നതായിരുന്നു ഉദ്ദേശം.

പക്ഷെ അമ്മ കരുതിയത് ഞാൻ അമ്മയെ മറന്നു എന്നാ. അതിന്റെ സൂചനകൾ ചേച്ചിയും അമ്മയുമായുള്ള സംസാരത്തിൽനിന്ന് എനിക്ക് മനസിലായി. ഞാൻ താഴേക്ക് ഇറങ്ങി ചെന്നപ്പോൾ ചേച്ചി എനിക്ക് ചായ തന്നിട്ട് ചോദിച്ചു..

“ഹരീ.. ഹരിക്കിത് ആരാന്നു മനസ്സിലായോ”

“പുതിയ ഹോം നേഴ്സ് ആണോ, വീരുനെ നോക്കാൻ…”

അമ്മയുടെ കണ്ണ് നിറഞ്ഞു,
എനിക്കതൊരു തമാശയായിട്ടാണ് തോന്നിയത് .

“ ഹ്മ്മ് മോനേ നോക്കാൻ വന്നതാ”

അമ്മ ഒന്നും മിണ്ടുന്നില്ല. അമ്മയുടെ വിഷമം കണ്ടിട്ടെന്നപോലെ ആര്യേച്ചി അമ്മയുടെ അടുത്തേക്ക് നീങ്ങിയിരുന്നിട്ട്

“പക്ഷെ ഹോം നേഴ്സ് ഒന്നും അല്ല.. ഇത് എന്റെ അമ്മയാ”

“ലക്ഷ്മി അമ്മയോ, ഇതോ”
ഞാൻ അത്ഭുതത്തോടെ ചോദിച്ചു

ലക്ഷ്മി അമ്മായിയെ എനിക്ക് ഓർമ്മയുണ്ടെന്ന് മനസിലാക്കിയ അവൾ പ്ലേറ്റ് മാറ്റി.

“ഇത് ഇത്….എന്റെ ഭദ്രന്റെ അമ്മയാ, നമ്മുടെ നാട്ടിൽ നിന്ന് വന്നതാ”

എന്നിട്ട് അമ്മക്ക് ഒരു ഉമ്മയും കൊടുത്തു. അമ്മ കണ്ണ് തുടച്ചു.

പിന്നെ എന്തൊക്കയൊ പറഞ്ഞിരുന്നു. എന്നാ എനിക്ക് അമ്മയെ ഓർമ്മയുണ്ടെന്ന് ഞാനോ, ഭദ്രന്റെ അമ്മ അല്ല എന്റെ അമ്മയാണെന്ന് അവർ രണ്ടുപേരുമോ പറഞ്ഞില്ല.

അവൾ വീരനെ കൊണ്ട് റൂമിൽ കിടത്തി. അമ്മ ടേബിളിൽ ഉണ്ടായിരുന്ന ചായ കപ്പ് എല്ലാം എടുത്തു അടുക്കളയിൽ പോയി. ഞാൻ ഒരു അഞ്ചു മിനിറ്റ് അവിടെ ഇരുന്നുകാണും.. അഞ്ചു മിനിറ്റ് തികച്ചൊ എന്ന് പോലും അറിയില്ല. ഞാൻ അമ്മയെ കാണാൻ അടുക്കളയിൽ ചെന്നു.

പാവം ഉരുന്ന് കരയുന്നു.. ലോകത്ത് ആരെ മറന്നാലും ഇനി ആര്യേച്ചിയെ മറന്നാലും എന്റെ അമ്മേ ഞാൻ എങ്ങനെ മറക്കാൻ. എന്റെ ഓരോ ചലനത്തിന്റെയും നോട്ടത്തിന്റെയും അർത്ഥം അറിയാവുന്ന അമ്മ എന്നെ കയ്യോടെ പിടിക്കും എന്നാ ഞാൻ
കരുതിയത്. പക്ഷെ അതുണ്ടായില്ല. ഞാൻ ഒരു നല്ല നടൻ ആണല്ലോ എന്ന് തോന്നിപ്പോയി.

“അമ്മേ അമ്മക്ക് ആര്യയുടെ തറവാട്ടിൽ നിക്കുന്ന ജാനകി രാമചന്ദ്രനെ അറിയോ,”

അമ്മ ഒന്ന് ഞെട്ടി എന്നിട്ട് അറിയാം എന്ന് തല ആട്ടി.

“എന്റെ അമ്മയാ, അവിടെ അവർക്ക് സുഖമാണോ എന്നറിയാൻ ആയിരുന്നു. എന്റെ ആ അമ്മാവൻ അവരെ അടുക്കള ജോലി ചെയ്യിക്കയാണെന്ന് കേട്ടു .”

“ആ അമ്മക്ക് സുഖം ആണ് മോനേ, ഭദ്രൻ അവരെയും പൊന്നുപോലാ നോക്കുന്നെ ”കണ്ണ് നിറഞ്ഞോണ്ടാണ് അമ്മ മറുപടി തന്നത്

“പിന്നെ എന്താ അവരിപ്പോ കറുത്ത് കരിവാളിച്ചു ഇരിക്കുന്നെ?”

അമ്മ കരയാൻ തുടങ്ങി

“എന്തിനാ ഈ അമ്മ ഇപ്പൊ കരയുന്നെ”

“നിനക്കെന്നെ മനസിലായില്ല എന്ന് കാട്ടിയപ്പോ ഞാനത് വിശ്വസിച്ചു പോയടാ”

കരച്ചിലാണോ ചിരിയാണോ സന്തോഷമാണോ എന്നൊന്നും മനസിലാക്കാൻ പറ്റാത്ത അവസ്ഥ.

“അതിന് എനിക്കിപ്പോഴും ഭദ്രന്റെ അമ്മേ അറിയില്ല, എനിക്ക് എന്റെ അമ്മ ജാനകികുട്ട്യേ അറിയുള്ളു”

അമ്മ എന്നെ കെട്ടിപ്പിടിച്ചു ഒരുപാട് കരഞ്ഞു. ഞാനും അമ്മ കരഞ്ഞു തീരട്ടെ എന്ന് കരുതി. പിന്നെ ഞങ്ങൾ ഒരുപാട് സംസാരിച്ചു.. എന്തിനെയൊക്കയോ പറ്റി.

ഞാൻ അമ്മേ തിരിച്ചറിഞ്ഞത് ആര്യേച്ചിയോട് പറയല്ലേന്നു ചട്ടം കെട്ടി. എനിക്ക് അറിയാമായിരുന്നു അമ്മ അപ്പൊത്തന്നെ ചെന്ന് പറയുമെന്ന്. ഭദ്രന്റെ അമ്മ നാടകം ആര്യേച്ചി അടുത്ത ലെവലിൽ കൊണ്ടോയി. പിന്നെയുള്ള ദിവസങ്ങളിൽ ഞങ്ങൾ ഒരു 4 വർഷം പിന്നിലേക്ക് പോയ ഫീലാണ് ഉണ്ടായത്.

ദിവസങ്ങൾ കടന്നുപോയി, ഇപ്പൊ വീരനെ ഡേ കെയറിൽ ആക്കാറില്ല, അമ്മയാണ് അവനെ നോക്കുന്നത്. അതുകൊണ്ട് തന്നെ ഉച്ചയാകുമ്പോൾ ഞാനും വീട്ടിൽ വന്നു ഊണ് കഴിക്കാൻ തുടങ്ങി. എനിക്ക് ഇപ്പൊ ഉച്ചക്ക് വീട്ടിൽ വരാനുള്ള കാരണം രണ്ടാണ്. അമ്മ ഉണ്ടാക്കുന്ന ആഹാരം ചൂടോടെ കഴിക്കാം, എന്നെ കാണിക്കാതെ കൊണ്ട് നടന്ന വീരനെ എനിക്ക് ഇപ്പൊ അവളുടെ ശല്യമില്ലാതെ കാണാം.. എടുക്കാം.

അങ്ങനെ ഞാനും അവനും വല്ലാതെ അങ്ങ് അടുത്തുപോയി. എന്റെ ഉള്ളിൽ ഏതോ ഒരു കോണിൽ അവനോട് ഒരുപാടു സ്നേഹം. എനിക്ക് അവൻ ഇല്ലാതെ പറ്റില്ല എന്ന അവസ്ഥയായി.

എനിക്ക് അമ്മയോടും ആര്യേച്ചിയോടും മുൻപ് തോന്നിയിട്ടുള്ളതിനെക്കാൾ തീവ്രമായ ഒരു സ്നേഹം.

അമ്മയും ആര്യേച്ചിയും ഇതൊന്നും അറിയാതെ ഇരിക്കാൻ ഞാൻ ശ്രദ്ധിച്ചു. പക്ഷേ എനിക്ക് തോന്നിയിട്ടുണ്ട് അമ്മക്ക് വ്യക്തമായി അറിയാം ഞാനും വീരനും ആയുള്ള ഈ അറ്റാച്ച്മെന്റ്.

ഒരിക്കൽ അമ്മ അവനെ കുളിപ്പിക്കാൻ പോയപ്പോൾ അമ്മേടെ കളിന്നു പിടഞ്ഞു അവൻ താഴെ വീണു, അതികം പൊക്കത്തിൽ നിന്നൊന്നു മല്ല. പക്ഷേ ഞാൻ അത് കണ്ടു അമ്മയെ ഒരുപാട് ഫയർ ചെയ്തു.. അമ്മ കരഞ്ഞുപോയി.

അതിന് മുൻപ് ഞാൻ എന്റെ അമ്മയെ ഒരിക്കൽ പോലും കരയിച്ചിട്ടില്ല.. അന്ന് എനിക്ക് കൊറച്ചു നാളായി വരാത്ത തലചുറ്റൽ വന്നു.. പക്ഷെ ഒരു തരത്തിൽ ഞാൻ പിടിച്ചുനിന്നു.

പണ്ട് ആര്യചേച്ചിക്ക് വേണ്ടി ആരോടേലും വഴക്ക് ഇടുമ്പോഴാണ് എനിക്ക് ഇങ്ങനെ ഒക്കെ വന്നിരുന്നത്. അന്ന് ഞാൻ തിരിച്ചു കടയിൽ പോയില്ല. നേരേ ഞാൻ എന്റെ സ്ഥിരം സ്പോട്ടിൽ പോയി നിന്നു.

ആ പാലം എന്തോ എനിക്ക് ഒരു പ്രത്യേക അറ്റാച്ച്മെന്റ്. ഒരുപാട് സമയം കഴിഞ്ഞു പോയി.. ഞാൻ ചിന്തിച്ചു, അവൻ എന്റെ ആരാ, എന്റെ പെണ്ണിന്റെ.. അല്ല, ചേച്ചിയുടെ മകൻ. അവനുവേണ്ടി ആണോ ഞാൻ എന്റെ സ്വന്തം അമ്മേ..

എനിക്ക് എന്തെന്നില്ലാത്ത വിഷമം തോന്നി. ഞാൻ അപ്പൊത്തന്നെ വണ്ടിയെടുത്തു വീട്ടിൽ തിരിച്ചു വന്നു അമ്മയോട് ക്ഷമ പറഞ്ഞു.

എന്നെ കെട്ടിപ്പിടിച്ചു കരഞ്ഞതല്ലാതെ വേറെ ഒന്നും മിണ്ടിയില്ല.

അന്ന് രാത്രിയിൽ അമ്മ എന്റെ മുന്നിൽ വെച്ച് രാവിലെ അമ്മേടെ കയ്യിൽ നിന്ന് കുഞ്ഞു താഴെ പോയ കാര്യം ആര്യേച്ചിയോട് പറഞ്ഞു. അമ്മേ അവൾ വല്ലതും പറയുമോ എന്നാരുന്നു എന്റെ പേടി.

അത് കേട്ടതും അവൾ ഒന്ന് ഞെട്ടി. അവൾ കുഞ്ഞിനെ പോയി എടുത്തു, എടുത്തപ്പോഴേ അവൻ കരഞ്ഞു. എന്റെയും അമ്മേടെയും നെഞ്ചു ഒരുപോലെ ഇടിക്കാൻ തുടങ്ങി.

ജാനുമ്മ നിന്നെ താഴെ ഇട്ടോടാ നമുക്ക് അമ്മക്ക് നല്ല അടി കൊടുക്കാമെ. എന്ന് പറഞ്ഞുചേച്ചി അവനെ കൊഞ്ചിച്ചു. അതല്ലാതെ ഞങ്ങൾ ശങ്കിച്ചപോലെ ഒന്നും അവൾ അമ്മേ പറഞ്ഞില്ല.

അമ്മയുടെ നിപ്പു കണ്ടിട്ടാവണം അവൾ വന്നു അമ്മേ സമാധാനിപ്പിച്ചു. എനിക്ക് അതൊരു വലിയ ആശ്വാസമായിരുന്നു.

എന്റെ അമ്മേ ആരേലും എന്തെങ്കിലും പറഞ്ഞാ എനിക്ക് അത്രമാത്രം വേദനിച്ചിരുന്നു. ഞാൻ അവളെ നന്ദിയോടെ നോക്കി.

“ഹരിക്ക് കൊടുക്കണോ അടി”

എന്ന് മോനോട് ചോദിക്കുന്ന കേട്ടു.. എന്നിട്ട് എന്നെ പതിയെ ഒന്ന് തല്ലിക്കാണിച്ചു, അവന്റെ ആ ചിരിയിൽ ഞാനും എല്ലാം മറന്നു നിന്നുപോയി.

അതിനുശേഷം ആര്യ എന്നിലേക്ക് അടുക്കുന്നപോലെ ഒരു തോന്നൽ. അതിൽപ്പിന്നെ ഞാൻ ആര്യേച്ചിയെ ശ്രദ്ധിക്കാൻ തുടങ്ങിയിരുന്നു,

ആര്യേച്ചി എന്റെ അമ്മയോട് കാണിക്കുന്ന സ്നേഹം പലപ്പോഴും എനിക്ക്പോലും അസൂയ ഉണ്ടാക്കാൻ തുടങ്ങിയിരിക്കുന്നു.

പണ്ട് ആര്യേ പ്രേമിച്ചകാലത്ത് ഏറ്റവും പേടിച്ച ഒരു വിഷയമായിരുന്നത്. എനിക്ക് ഇനി എങ്ങാനും അവളെ കെട്ടാൻ പറ്റിയാൽ അവൾ അന്ന് എന്നോട് കാണിക്കുന്ന അവഗണന അമ്മയോടും കാണിക്കുമോ?.

ഞാൻ എന്റെ ഇഷ്ടം തുറന്നു പറയാത്ത തിന്റെ കാരണങ്ങളിൽ ഒന്ന് അതായിരുന്നു. അന്നേ എന്റെ ഇഷ്ടം അവളോട്‌ പറയേണ്ടിയിരുന്നു. ഇനി പറഞ്ഞിട്ട് എന്താ കാര്യം.. ഭദ്രൻ കൊണ്ടോയില്ലേ എന്റെ പെണ്ണിനെ.

എന്റെ പെണ്ണ്..!!

അങ്ങനെ ചിന്തിച്ചപ്പോൾ മനസ്സിൽ ഒരു സുഖം.

ദിവസങ്ങൾ കഴിഞ്ഞു.. എനിക്കിപ്പൊ ആര്യേച്ചിയോടു വല്ലാത്ത പ്രേമം. ഉള്ളില്‍ അടക്കി വെച്ചത് പുറത്തു ചാടിയപോലെ..

ഞാൻ എത്ര ശ്രമിച്ചിട്ടും വീണ്ടും വീണ്ടും ആ പ്രണയത്തിൽ വീണുപോകുന്നു, അത് തെറ്റാണ് എന്ന് ഞാൻ എന്റെ മനസ്സിൽ പല ആവർത്തി പറഞ്ഞു. അവളുടെ സാമിപ്യം എനിക്ക് ആകെ പ്രാന്ത് പിടിക്കാൻ തുടങ്ങി. [ തുടരും ]