സ്വപ്നം – “ ഏട്ടാ.. എണീറ്റേ… ഏട്ടാ.. എന്ത് ഉറക്കമാണിത്.. ഉച്ചയായി ഏട്ടാ..ഇനി എങ്കിലും എണീക്കുന്നുണ്ടോ “

ആരോ എന്റെ പുതപ്പ് വലിച്ചെടുത്തു.

“അയ്യേ.. ഇതെന്താ ഈ കാണുന്നേ… ഛെ.. വൃത്തികേട്.. നാണമില്ലാത്ത സാധനം, കിടക്കുന്ന കണ്ടോ.. തുണിയും മണിയുമില്ലാതെ.. തനി കാടൻ” അവൾ പിറുപിറുത്തു

അയയിൽ നിന്നും ഒരു മുണ്ട് വലിച്ചെടുത്തു എന്റെ ദേഹത്തേക്ക് വിടർത്തി എറിഞ്ഞിട്ട് അവൾ ഇറങ്ങിപ്പോയി.

ഞാൻ പതിയെ ഉണർന്നു.. അര ബോധത്തിൽ, മിന്നായം പോലെ ആ ഇറങ്ങിപ്പോയ സ്ത്രീരൂപത്തിന്റെ പിന്നാമ്പുറം മാത്രം കണ്ടു.

“ആരാ അവൾ!…. ?
ഞാൻ ഇതെവിടെയാ?”

സ്വബോധം വീണ്ടെടുക്കാൻ ശ്രമിച്ചെങ്കിലും എന്റെ ബോധമനസ് ഏതോ പുകക്കുള്ളിൽപ്പെട്ട അവസ്ഥ. ഒന്നും വ്യക്തമല്ല. ഇനി ഇത് സ്വപ്നമാണോ എന്നൊരു തോന്നൽ മനസിലൂടെ പാഞ്ഞു.

ചുറ്റും ആകെ ഒന്ന് പരതി നോക്കിയപ്പോഴാണ് അത് ഞാൻ ശ്രദ്ധിക്കുന്നത്.. ഞാൻ തീർത്തും നഗ്നനാണ്!!

എന്റെ ശരീരത്തിലേക്ക് സ്വയം നോക്കിയപ്പോൾ, നെഞ്ചിൽ മൊത്തത്തിൽ, കാട്പിടിച്ചു കിടക്കുന്ന രോമങ്ങള്‍, ആരോ നെഞ്ചിൽ ഉഴുതു മറച്ചിട്ട്, രോമങ്ങൾ തമ്മില്‍ കുരുങ്ങിക്കിടക്കുന്നു, അതിനടിയിലൂടെ ചില വിരൽച്ചാലുകൾ കാണാം.. ഇതെങ്ങനെ സംഭവിച്ചു?
എനിക്ക് ഇത്രയും രോമങ്ങൾ ഇല്ലല്ലോ!!. അതോടെ, ഞാൻ സ്വപ്നം കാണുവാണെന്നു മനസ് പറഞ്ഞു, ഇതെന്തു സ്വപ്നം..!!

ആരാണവൾ ?, ഞാനവളെ കണ്ടിട്ടുള്ള പോലെ, അല്ല.. നല്ല ആത്മബന്ധമുള്ളപോലെ.. അത് ചേച്ചി ആകുമോ? ആ.. ഈ സ്വപ്നം, ഞാൻ എന്നോ കാണാൻ ആഗ്രഹിച്ച എന്തോ ഒന്നിന്റെ ബാക്കി പത്രമാണെന്ന് ആരോ പറയുന്നു.

ആ ഒഴുക്കിൽത്തന്നെ ഞാൻ എന്റെ മനസിനെ സ്വതന്ത്രമാക്കി വിട്ടു.

എന്റെ ദേഹത്തേക്ക് അവൾ എറിഞ്ഞ മുണ്ട് എടുത്തുടുത്തു ഞാന്‍ എഴുന്നേറ്റു. കാലുറപ്പിച്ചു നിക്കാൻ തന്നെ നന്നേ ബുദ്ധിമുട്ടുന്നുണ്ടെങ്കിലും ഭിത്തിയിൽ പിടിച്ച് ആ മുറിവിട്ടിറങ്ങി.

കണ്ടിട്ട് ഇതൊരു രണ്ട്നില വീടാണെന്ന് തോന്നുന്നു, ഞാന്‍ സ്റ്റെപ്പ് ഇറങ്ങി.. അകത്ത്ന്ന് ദോശമാവ് കല്ലില്‍ വീഴുമ്പോളുള്ള ശബ്ദം. അതിനു പിന്നാലെ ചട്ടുകം ദോശക്കല്ലിൽ മുട്ടുന്ന ശബ്ദമൊക്കെ കേൾക്കുന്നു. എന്‍റെ ശ്രദ്ധ അവിടേക്കായി, അവിടെനിന്ന് ആരോ, എന്തൊക്കയോ സംസാരിക്കുന്നു..

നേരത്തെ മിന്നായംപോലെ കണ്ട പെണ്ണാകുമോ? അവളെ കാണണമെന്ന് മനസു വല്ലാണ്ട് തുള്ളി. അവിടേക്ക് ചെന്നു,

“‘ഒരു നാണോം മാനോം ഇല്ലാത്തൊരുത്തൻ, സമയത്തു മനുഷ്യനെ ഉറക്കേമില്ല.. നേരത്തിന് എഴുന്നേക്കേമില്ല, കിടക്കുവാ.. അവിടെ, തുണിയും മണിയുമില്ലാതെ.. കാടൻ, ഇന്നലെ കാണിച്ച പരാക്രമം കാരണം മനുഷ്യന് നിക്കാൻ വയ്യാ.. എന്നിട്ടും ബാക്കിയുള്ളോര്‍ ഇവിടെനിന്ന് പണി എടുക്കുവാ, ഇനി എപ്പോഴേലും വരും.. തീറ്റിയുമില്ല കുടിയുമില്ല, എനിക്ക് ഇനി വയ്യേ.”
ആരോടെന്നില്ലാതെ ദോശ ഉണ്ടാക്കിക്കൊണ്ട് അവൾ സംസാരിച്ചു കൊണ്ടേയിരുന്നു.

ഞാൻ അടുക്കളപ്പടിയിൽ ചെന്ന് അവളെ നോക്കിനിന്നു. ഞാൻ വന്നത് അവൾ അറിഞ്ഞിട്ടില്ല. ഇപ്പൊ കാണുന്നത് സാരിയിൽ നിൽക്കുന്ന അവളുടെ പിന്നഴകാണ്. അവളുടെ നീളത്തിന് ആ കോട്ടൻ സാരി ചേരും. ഇങ്ങ് പുറകിൽ നിന്ന് നോക്കുമ്പോൾ ജനൽ വഴി അടിക്കുന്ന സൂര്യരശ്മിയിൽ അവളുടെ മുടിക്ക് ചുറ്റും സ്വർണനിറത്തിൽ മിന്നിനിക്കുന്നു.

ഒറ്റ നോട്ടത്തിൽ ഏതോ വനദേവത അടുക്കളയിൽ എനിക്കായി ദോശചുടുന്നപോലെ തോന്നി. അല്ല ഇത് എന്‍റെ ആര്യേച്ചി അല്ലേ? അവൾ എന്‍റെ സ്വപ്നത്തിൽ.. !!

നേരിട്ടല്ലേ സംസാരിക്കാൻ പേടിയുള്ളൂ.. ഇപ്പൊ അതിന്റെ ആവശ്യമില്ലല്ലോ.. സ്വപ്നമല്ലേ.. മനസിലുള്ളത് എല്ലാം പറയാം, അല്ല ആരോ എന്നെ തള്ളി വിടുന്നപോലെ !!

ഞാൻ പതിയെ ഒച്ചയുണ്ടാക്കാതെ പുറകിൽകൂടെ പോയി ഇടുപ്പിലൂടെ കൈ ഇട്ട് കെട്ടിപ്പിടിച്ചു. അവൾ ഒന്ന് ഞെട്ടിയെങ്കിലും അൽപ്പനേരം അനങ്ങാതെ നിന്നുതന്നു. ഞാൻ മാറാൻ ഉദ്ദേശമില്ലെന്നറിഞ്ഞു..

“മതി.. മതി.. എന്നെ വിട് ചേട്ടാ, എന്നിട്ട് പോയൊന്ന് കുളിക്ക്, നാറുന്നുണ്ട്..”

ഇതെന്റെ ആര്യേച്ചിയാണോ ?
അവൾ എനിക്ക് കെട്ടിപ്പിടിക്കാൻ ഇങ്ങനെ നിന്നുതരുമോ!.
ഞാനവളെ തൊടാനുള്ള ധൈര്യം കണിക്കോ. ഉള്ളിൽനിന്ന്
ആരോ പറയുന്നു.. ഞാനത് കേൾക്കുന്നു..

കൂടുതൽ ഒന്നും ചിന്തിക്കാനുള്ള ബോധം ഇപ്പോഴില്ല.. ഞാൻ അനങ്ങിയില്ല..അതെ നിൽപ്പുനിന്നു. പിന്നെ പതിയെ കഴുത്തിനു പിന്നിൽ ചുണ്ട്കൊണ്ട് ഒന്നുരച്ചു..

അവൾ തള്ളവിരലിൽ ഒന്ന് പൊങ്ങി !! അവളുടെ സ്വർണനിറമുള്ള രോമങ്ങൾ കോൾമയിർ കൊണ്ടു. ഉപ്പൂറ്റി തിരിച്ചു നിലത്തു കുത്തിയതും അവൾ കൈ മുട്ട് വെച്ച് ശക്തിയായി എന്നെ തള്ളി. എന്റെ സാമിപ്യം അസ്സഹനീയമായപോലെ !!

കയ്യിലിരുന്ന ചട്ടുകത്തിന്റെ പിടിവശം എന്റെ മണികണ്ഠനിലേക്കാണ് വന്ന് കേറിയത്‌. മിന്നൽ അടിക്കുന്നപോലെ എന്തോ ഒന്ന് മിന്നി. മണ്ടയിൽ 1000 വാട്സ് ബൾബ് കത്തിയപോലെ.. പെട്ടെന്ന് ബോധം വന്നപോലെ !!

ഞാൻ അറിയാതെ അവളിൽനിന്ന് വിട്ടുമാറി, മണികൾ പൊത്തിപ്പിടിച്ചു നിന്ന്പോയി. അല്ല ഇത് സ്വപ്നമല്ല.. സത്യമാണ്.. എനിക്ക് ശെരിക്കും സ്ഥലകാല ബോധംവന്നു. ഞാനിപ്പൊ എന്താ ഈ ചെയ്തത്. എന്നാൽ ബുദ്ധിയിൽ ആ വ്യക്തത വീണ്ടും മങ്ങുന്നപോലെ തോന്നി !!.

അതേ സമയം, അത്ര പെട്ടെന്ന് എന്താ അവളുടെ ചുറ്റുമുണ്ടായിരുന്ന പിടുത്തം വിട്ടത് എന്ന് തിരിഞ്ഞു നോക്കിയപ്പോഴാണ് എന്റെ നിൽപ്പ്കണ്ട് അവൾക്കും കാര്യം മനസ്സിലായത്.

“അയ്യോ.. എന്താ പറ്റിയത് ? എന്റെ കൈ കൊണ്ടോ?, ഞാൻ അറിയാതെ…” അവൾ പറഞ്ഞു..

എന്റെ വെപ്രാളത്തിൽ ഞാൻ..

“പോടീ കോപ്പേ.., അവടെ അമ്മേടെ ഒരു ചട്ടുകം !!”

ഞാൻ പെട്ടെന്ന് നിർത്തി.

അവൾ അതിനൊന്നും മിണ്ടിയില്ല, എനിക്ക് എന്തേലും പറ്റിയോ എന്ന ആവലാതിയോടെ എന്നെ നോക്കി !!

ഇവൾക്ക് എന്ത് പറ്റി ? അല്ലേ ഒന്ന് തൊട്ടാൽ, എന്തേലും വിളിച്ച് എന്നെ ദേഷ്യത്തോടെ ഒരു വഴിയാക്കുന്നയാളാ. അങ്ങനെ എന്തേലും ചെയ്താ എന്നോടു കാണിക്കുന്ന ദേഷ്യം.. ഹോ!..ഇപ്പൊ ഒരു മുത്തം കൊടുത്തിട്ടും ആ നീരസം മുഖത്തില്ല. ഞാൻ ഇപ്പോഴും സ്വപ്നം കാണുകയാണോ. അല്ല എന്നതിന് ഉത്തരമായി മിന്നുന്ന വേദന ഇപ്പോഴും എനിക്ക് തരുന്നുണ്ട്.. മണിയാശാൻ !!

അവൾ ഓടിപ്പോയി ഐസ്‌ പാക്ക് എടുത്തോണ്ട് വന്നു.

ഞാൻ അതുകണ്ടിട്ട്..

“ഇതൊന്നും വേണ്ട.. ഒന്ന് തുള്ളിയാ തനിയെ മാറിക്കോളും.. ചേച്ചി ഇത് കൊണ്ടോയെ”

എന്നിട്ട് ഞാൻ കൊറച്ചുനേരം തുള്ളി, ഇവർക്കറിയില്ലല്ലോ ഞങ്ങൾ ആണുങ്ങൾക്ക് മണിക്കിട്ട് കിട്ടിയാൽ ജീവൻ എടുക്കുന്നപോലെയാണെന്ന്.
ആ വേദനക്ക് അൽപ്പം ശമനമായി !!

“മാറിയോ”
പൊട്ടത്തി കണ്ണും നിറച്ചോണ്ട് ചോദിക്കുന്നു..

ഇവൾക്ക് ഇത് എന്താ പറ്റിയെ ? ഇവൾ ഇതിലും വലിയ വേദന സമ്മാനിച്ചിട്ടുണ്ട്.. ശരീരത്തിനും, മനസിനും. അന്നൊന്നും ഇതുപോലെ ഒരു പെരുമാറ്റം ഞാൻ കണ്ടിട്ടില്ല !!

“ഓഹ്! ഇപ്പൊ കൊഴപ്പമില്ല, ഇഷ്ടമില്ലേ പറഞ്ഞാപ്പോരെ !! എന്തിനാ ചേച്ചി അതൊക്ക കുത്തിപ്പൊട്ടിക്കുന്നെ?”

എനിക്ക് വലിയ പ്രശ്നം ഇല്ലെന്ന് മനസിലാക്കിയ അവൾ..

“”ഞാൻ വയറ്റിൽ തള്ളി മാറ്റാനാ നോക്കിയത്.. അറിഞ്ഞില്ല അവിടെ അടി വീഴുമെന്ന്.. സോറി”

“വയറ്റിൽ ആണേലും ആര്യേച്ചി ഇടിക്കോ?”

“ഇല്ലാ.. എന്താ ഏട്ടനിപ്പൊ.. എന്നെ എന്താ വിളിച്ചേ…”

“ഇല്ല ആര്യേച്ചി.. ഞാൻ അറിയാതെ വേദനിച്ചപ്പോൾ നീ എന്ന് വിളിച്ചതാ.. ഇനി അതിനെന്നെ തല്ലാൻ വരണ്ട “

“അതല്ല…. ആര്യേച്ചീ ….”

“അതിനെന്താ, ഇപ്പൊ അതും കുറ്റമായോ”

അപ്രതീക്ഷിതമായി അവൾ എന്നെ കെട്ടിപ്പിടിച്ചു ഒരുപാട് ഉമ്മ മുഖത്തും നെറ്റിയിലുമൊക്കെ വെച്ച്..

“ശ്രീ ഹരി..”

“എന്താ..ആര്യേച്ചി.. എന്താ ഇപ്പൊ ഇങ്ങനെയൊക്കെ ചെയ്‌തെ..!”

“ഇല്ല.. ഒന്നുമില്ല.. ഞാനിപ്പൊ വരാം…”

എന്നെ അവിടെയാക്കി.. അവൾ ഓടി !!, ആര്യേച്ചീടെ ആ പാച്ചിലിനിടയിൽ ഞാൻ അവളുടെ മുഖത്ത് സന്തോഷമൊ, അങ്ങനെ എന്തെക്കെയോ വികാരങ്ങൾ കണ്ടു.

ആരെയൊക്കയോ ഫോൺ ചെയ്തു, കുറച്ചു കഴിഞ്ഞു വന്നു.. ഒന്നും സംഭവിക്കാത്ത ഭാവത്തിൽ.

എനിക്ക് അകെയൊന്നും മനസിലാകുന്നില്ല !! ആര്യേച്ചി എന്തിനു എന്നെ ഏട്ടാന്ന് വിളിക്കണം?

എന്നെ ഭരിച്ചുകൊണ്ടിരിന്നവൾ എന്തിനു എനിക്ക് കീഴ്പ്പെട്ട് സംസാരിക്കണം?

ഒന്നറിയാം.. ഞാൻ ഇതൊന്നും സ്വപ്നം കണ്ടതല്ല !! എന്തോ എനിക്ക് സംഭവിച്ചിട്ടുണ്ട് !!. എനിക്ക് കാര്യങ്ങൾ ഓർക്കാൻ അൽപ്പം ബുദ്ധിമുട്ടുണ്ട്..

പക്ഷെ എന്റെ ഓർമ്മയിലെ ആര്യേച്ചിക്ക് ഇത്ര തടിയില്ല, അന്ന് ഒരു ഈർക്കിലിൽ തുണി ചുറ്റിയ രൂപമായിരുന്നു, ഇപ്പൊ കണ്ടാൽ എന്റെ ആര്യക്ക് സൗന്ദര്യം കൂടിട്ടെ ഉള്ളു.

ഓർമ്മവെച്ചനാൾ മുതൽ ഞാൻ പ്രണയിക്കുന്ന എന്റെ മുറപ്പെണ്ണാണവൾ, എന്നേക്കാളും മൂന്ന് വയസ് കൂടുതലുണ്ട്.., പക്ഷെ പരിചയം ഇല്ലാത്തോരുടെ കണ്ണില്‍ ഞാനാണ് മൂത്തത്. ചെറുപ്പത്തിൽ എനിക്ക് പ്രണയമൊന്നുമില്ലായിരുന്നു.. സത്യത്തില്‍ എന്റെ ശത്രുവായിരുന്നവൾ. എന്നെ കരയിക്കുന്നതായിരുന്നു അവൾക്ക് വിനോദം. പക്ഷേ എപ്പോഴോ അറിയാതെ ഞാൻ അവളെ പ്രണയിച്ചു പോയി, പറയാൻ ഭയമായിരുന്നു, ഇപ്പോഴും അത് അങ്ങനെ തന്നാണ്. പക്ഷേ ഇപ്പോഴത്തെ ഈ പെരുമാറ്റത്തിൽ എന്തൊക്കെയോ നേടിയെന്നൊരു തോന്നൽ.

“ശ്രീഹരി.. ഞാൻ നിന്നോട് കുളിക്കാൻ പറഞ്ഞത് നീ കേട്ടില്ലേ, നീ വേഗം പോയി കുളിക്കാൻ നോക്ക്”

ആര്യേച്ചി എനിക്ക് പരിചയമുള്ള ഗൗരവ ഭാവം മുഖത്തുവരുത്തി. ഒരു മാറ്റവുമില്ല.. ഇത് ആര്യ മഹാദേവ് തന്നെ.. ഞാൻ പിറുപിറുത്തു.

“ഹമ് എന്താ!…ഇപ്പൊ കൊഴാപ്പം ഇല്ലല്ലോ, തല ചുറ്റുന്നുണ്ടോ?”
അവള്‍ തുടര്‍ന്നു..

ഇല്ലാന്നു ഞാൻ തലയാട്ടി.. എങ്കിലും ഇപ്പോഴും ഞാൻ പൂർണ ബോധത്തിൽ വരുന്നേയുള്ളു..

“എന്നാ നീ പോയി കുളിക്കു.. എനിക്ക് ദോശ ചുടണം, രാവിലെ കുളിക്കാതേം നനയ്ക്കാതേം അടുക്കളയിൽ വന്നേക്കുന്നു അവൻ”

“ഞാൻ വേണമെങ്കിൽ..”

“നീ വേണമെങ്കിൽ ?”

“അല്ല.. ദോശ ചുട്ട് തരാം..”

“നീ അങ്ങനെ ചുട്ടതാണല്ലോ.. അവിടെ ആ കരിഞ്ഞു കിടക്കുന്നത്..”

അവൾ എന്നോട് ചൂടായി.. ഞാൻ ആ ദോശ കരിഞ്ഞതൊന്നും ശ്രദ്ധിച്ചില്ലാരുന്നു. അവൾ ഓടി.. ഗ്യാസിന്റെ തിരിതാഴ്ത്തി.

“നീ പോയില്ലേ?”

“സോപ്പ് ഇല്ല കുളിമുറിയിൽ !”

“സോപ്പും തോർത്തും എല്ലാം കുളിമുറിയിലുണ്ട്.. കൈ നീട്ട്.. എണ്ണ തരാം.”

കൈ നീട്ടി എണ്ണ മേടിച്ചു..അപ്പോഴും എന്റെ പ്രധാന സംശയം ബാക്കി.

കുളിമുറി എവിടെ?

“എന്താ ?” അവൾ വീണ്ടും ചോദിച്ചു

“കുളിമുറി !!”

“നിന്‍റെ റൂമിലല്ലേ.. കുളിമുറി !!
അതും ഞാൻ കാണിച്ചുതരണോ?”

അടുത്ത ചോദ്യം.. എന്റെ റൂം എവിടെ ? എന്നാരുന്നു.. പക്ഷെ പെട്ടെന്ന് ചിന്തിച്ചപ്പോൾ എന്റെ റൂം ഞാൻ കിടന്ന റൂം ആയിരിക്കുമെന്ന് തോന്നി. [ തുടരും ]