“എടാ മോനെ ജഹാൻകിറേ… അതിനു കൂടെ ചേർത്തു നിങ്ങളെ ഞാൻ വിസ്തരിച്ചു ഒന്ന് കാണാടാ മക്കളെ ”

“നടക്കില്ല അവറാച്ചാ… ഇത് കേസ് വേറെയാണ്… ഞങ്ങളുടെ കൈയ്യിലുള്ള സകല വീഡിയോസും വച്ച് പോലീസിൽ ഒരു കേസ് കൊടുത്താൽ മതി… ആദ്യം നജീബ് കുടുങ്ങും… പിന്നെ അവറാച്ചനും… നാണക്കേടാവും ”

“അയ്യോ.. എടാ മക്കളെ ബുദ്ധിമോശം ഒന്നും കാണിക്കല്ലേ… എന്താ വേണ്ടത് എന്ന് വച്ചാൽ പറഞ്ഞാൽ മതി..
ഈ അവറാച്ചൻ ഏറ്റുന്നേ “

കാര്യം അവറാച്ചൻ ആ നാട്ടിലെ പൂത്ത കാശുകാരൻ ആണേലും ആളൊരു പേടിത്തൊണ്ടനാണ്.

“എങ്കിൽ അവറാച്ചാ… ദേ ഈ വിനു ഉണ്ടല്ലോ… ഇവൻ ആള് മിടുക്കനാ… ഇവന് ഒരു ആഗ്രഹം… അവറാച്ചന്റെ കൊച്ച് മോളെ ഒന്ന് കെട്ടണമെന്ന്… പിള്ളേരല്ലേ അങ്ങ് സാധിച്ചു കൊടുക്കെന്നേ ”

“ടാ മോനെ.. ഇത്രയും വലിയ ആഗ്രഹം വേണോ? ”

“അത് പിന്നെ അവറാച്ചാ… നിങ്ങളുടെ കുടുംബത്തിന്റെ മാനം മുഴുവൻ ദേണ്ടേ.. ഈ പയ്യന്റെ കൈയ്യിലാ… അവറാച്ചന്റെ കൊച്ച് മോളുടെ കെട്ടിയോൻ ആയാൽ പിന്നെ നിങ്ങളുടെ കുടുംബത്തിന്റെ മാനം എന്ന് പറയുന്നത് ഇവന്റെയും മാനമല്ലയോ… ”

“എന്നാലും ജഹാൻഗീറേ? ”

“ശോ എന്റെ അവറാച്ചാ.. ഇവൻ ഞങ്ങളെപ്പോലെ അല്ല… എഞ്ചിനീയറിംഗ് ഒക്കെ പഠിച്ചിട്ടുള്ളതാ ”

“ആണോ? “അവറാച്ചൻ എന്നോട് ചോദിച്ചു.

“അത് പിന്നെ പഠിക്കാൻ പോയതാ… മുഴുവൻ ആക്കിയില്ല “ഒട്ടും ആലോചിക്കാതെ ഒരു പ്രൊപ്പോസൽ വന്നപ്പോൾ ഭാവി അച്ചാച്ചന്റെ മുന്നിൽ ഞാൻ വിനയാകുലനായി.