ഞങ്ങൾ ഒരുമിച്ചു ഒരു സ്കൂളിലാണ് പഠിച്ചത്. പഠിക്കാൻ മിടുക്കനായ അവനോട് എല്ലാ കുട്ടികളെയും പോലെ എനിക്കും ഒരു ക്രഷ് ഉണ്ടായിരുന്നു. പതിയെ ഞങ്ങൾ സൗഹൃദത്തിലായി. പിന്നേ പ്പിരിയാൻ പറ്റാത്ത അവസ്തയിലുള്ള പ്രണയം. ഞങ്ങൾ ഒന്നിക്കാൻ തീരുമാനിച്ച നാൾ അപ്പനും അപ്പന്റെ അനിയന്മാരും കൂടി അവനെ തല്ലി ഇഞ്ചപ്പരുവമാക്കി, നാട് കടത്തി.

എന്നോടവർ അവനെ കൊന്നു കളഞ്ഞു എന്നാണ് പറഞ്ഞത്. എനിക്കതു സഹിക്കുന്നതിലും അപ്പുറമായിരുന്നു..

ഞാൻ മെന്റലി തകർന്നു. എന്റെ വീട്ടുകാർ വിചാരിച്ചത്, അവനെ തല്ലിയോടിച്ചാൽ, അവർ പറയുന്ന ഏതെങ്കിലും ചെക്കനെ ഞാൻ കെട്ടുമെന്നാണ്.. പക്ഷെ, എന്റെ തീരുമാനം ഉറച്ചതായിരുന്നു..

എനിക്ക് സപ്പോർട്ടായിട്ട് എന്റെ വീട്ടിൽ ആകെയുണ്ടായത് എന്റെ കൂടപ്പിറപ്പാണ്. എന്റെ ചേച്ചി മോളി..

എനിക്ക് അവളും അവൾക്ക് ഞാനും ജീവനായിരുന്നു.

ചേച്ചി തൻ്റെ 17-ാമത്തെ വയസ്സിൽ വിവാഹിതയായിരുന്നു. വീട്ടുകാർ കണ്ടെത്തിയ ആളായിരുന്നു വരൻ. ജോൺ. ഒരു അയ്യോ പാവമായിരുന്നു. അവർക്ക് ഒരു മകനുണ്ടായി. എബി. അവൻ ചേച്ചിയുടെ മാത്രമല്ല എൻ്റെയും മകനായിരുന്നു. എനിക്കവൻ ജീവനായിരുന്നു.

തികച്ചും യാദൃശ്ചികമായിട്ടാണ് ചേച്ചി കാൻസർ ബാധിതയാണെന്ന് അറിഞ്ഞത്. നേരത്തെ ചേച്ചിക്ക് അസുഖം ഉണ്ടായിരുന്നെങ്കിലും അത് ക്യാൻസറാണെന്ന് കണ്ടെത്തിയിരുന്നില്ല. അറിഞ്ഞപ്പോൾ സിവിയർ സ്റ്റേജിലായിരുന്നു.