പതിവുപോലെ അന്നും അയാൾ മദ്യപിച്ചുതന്നെയാണ് എത്തിയത്. രാത്രിയിൽ ഉറങ്ങാൻ കഴിയാതെ അവൾ കുറച്ചുനേരം കട്ടിലിൽ എഴുന്നേറ്റിരുന്നു.

മനംപുരട്ടുന്ന ഗന്ധം വ്യാപിച്ചു കിടക്കുന്ന ആ റൂമിൽ കിടക്കാൻ കഴിയാതെ തന്റെ ഷീറ്റും തലയിണയുമെടുത്ത് അവൾ ഹാളിലേക്ക് പോയി. അവിടെ മൂത്തമകൻ ഉറങ്ങാതെ ഫോണും നോക്കിയിരിക്കുന്നു.

എന്താടാ നിനക്ക് ഉറങ്ങാൻ സമയം ആയില്ലേ ? അവൾ ചോദിച്ചു

ഉറങ്ങാൻ പോകുന്നമ്മെ, അമ്മ എന്താ ഇവിടെ ?

ചൂട് കാരണം റൂമിൽ ഉറങ്ങാൻ പറ്റുന്നില്ല. ഇവിടെയാകുമ്പോൾ കുറച്ചു വിശാലമായി കിടക്കാമല്ലോ എന്ന് വിചാരിച്ചു. നീ ആ ഫോൺ മാറ്റി വച്ചിട്ട് കിടന്നു ഉറങ്ങു.

എന്ന് പറഞ്ഞു കൊണ്ട് ഹാളിന്റെ മറ്റൊരു ഭാഗത്തു അവൾ ഷീറ്റ് വിരിച്ചു കിടന്നു. രാത്രിയിൽ എപ്പോഴാണ് ഉറങ്ങിയതെന്നു ഓർമ്മയില്ല.

ബെഡ്റൂമിൽ നിന്നും മാറി കിടന്നപ്പോഴേക്കും അവൾക്ക് നല്ല ഉറക്കം ലഭിച്ചിരുന്നു.

പിന്നീടുള്ള ദിവസങ്ങളിൽ റൂമിൽ കിടക്കാൻ അവൾക്ക് മനസുവന്നില്ല. ഹാളിന്റെ ആ അറ്റത്തായി അവളുടെ ഉറക്കം പതിവായി.

അമ്മ അവിടെ ഉള്ളതുകൊണ്ട് മൂത്ത മകന്റെ ഫോൺ ഉപയോഗവും കുറണ്ടു.

ഉറങ്ങാൻ കിടക്കുമ്പോഴെല്ലാം അവൾ അവനെ ഒരുപാട് ഉപദേശിക്കുമായിരുന്നു.

പഠനം തുടരണമെന്നും, കൂട്ടുകാരുമായി അധികം കൂട്ടുകൂടരുതെന്നും, അനിയന്മാർ നിന്നെ കണ്ടാണ് പഠിക്കുന്നത്, അതിനാൽ അവർക്ക് മാതൃകയായി ജീവിക്കണമെന്നുമെല്ലാം അവനോടു പറയുമായിരുന്നവൾ.