എന്നാൽ കാലവും വാർദ്ധക്യവും അവരെ കൊണ്ട്പോയി. അവർ വച്ച് കൊടുത്ത വഷളത്തരത്തിന് ഇപ്പോൾ സഹിക്കുന്നതും അനുഭവിക്കുന്നതും താനാണെന്ന് ഓർത്തപ്പോൾ അവൾക്ക് സഹിക്കാൻ കഴിഞ്ഞില്ല.

മൂത്ത മകന് ഇപ്പോൾ ഇരുപത്തിമൂന്നു വയസ്സായി. വളരെ ബുദ്ധിമുട്ടിയാണ് കോളേജിൽ ഒരു സീറ്റ് നേടിക്കൊടുത്തത്. എന്നാൽ കൃത്യമായി ക്ലാസ്സിൽ പോകാതെ കൂട്ടുകാരുമൊത്തു ബൈക്കിൽ ചുറ്റലാണ് അവന്റെ പണി.

താൻ സ്വരുക്കൂട്ടി സമാഹരിച്ചു വച്ച പണമാണ് കോളേജിലെ ഫീസിനായി കൊടുത്ത്. രണ്ടാമത്തവന് പഠനത്തിൽ താൽപ്പര്യം ഇല്ലാത്തതുകൊണ്ടു പ്ലസ്ടു കഴിഞ്ഞു ഒരു ഫർണിച്ചർ ഷോപ്പിൽ ജോലി നോക്കുന്നു. എന്നാൽ അവനും നേരെ ചൊവ്വേ ജോലിക്കു കയറാതെ പുഴയിലും കുളത്തിലും മീൻ പിടിത്തവും, കൂട്ടുകാരുമായി ട്രിപ്പിന് പോകലുമാണ് പതിവ്.

മൂന്നാമത്തവൻ ഇപ്പോൾ പ്ലസ്ടു പഠനം കഴിഞ്ഞു വീട്ടിൽത്തന്നെയാണ്. പറയുന്ന ഒരുകാര്യം പോലും അനുസരിക്കാൻ അവനു താൽപ്പര്യമില്ല.

തന്റെ ഭർത്താവ് വർഷങ്ങളോളം വിദേശത്ത് ജോലി നോക്കിയിരുന്നെങ്കിലും, അവിടെയുള്ള കമ്പനി പൂട്ടിയതിനാൽ ഇപ്പോൾ നാട്ടിൽത്തന്നെയുണ്ട്. നാട്ടിൽ തിരിച്ചു വന്നതിനുശേഷം ഒരു നിയന്ത്രണവുമില്ലാത്ത മദ്യപാനമാണ് അദ്ദേഹത്തിന്റേത്.

തന്റെ വിധിയെ പഴിച്ചുകൊണ്ട് കവിളിലൂടെ ഒഴുകിയിറങ്ങിയ കണ്ണുനീർ മറ്റാരും കാണാതെ അവൾ തുടച്ചു.