ലവ് സ്റ്റോറി – അവിടെ എത്തിയതും മനുവേട്ടൻ സിഗരറ്റെടുത്ത് വലിക്കാൻ തുടങ്ങി.

അപ്പോളും എന്നോട് ഒന്നും മിണ്ടുന്നില്ലായിരുന്നു. ആദ്യത്തെ സിഗററ്റ് കഴിഞ്ഞപ്പോൾ വേറെ ഒരെണ്ണം കൂടി എടുത്ത് വലിക്കാൻ തുടങ്ങി.

പെട്ടെന്നയാൾക്ക് ചുമ വന്നു. വെപ്രാളത്തിൽ വലിച്ചത് കൊണ്ടായിരിക്കും.

എനിക്കപ്പോൾ ശരിക്കും ദേഷ്യമാണ് വന്നത്.. അത്രയും നേരം ഒന്നും മിണ്ടാതെയിരുന്ന ഞാൻ ഞങ്ങൾക്കിടയിലെ നിശബ്ദതയെ ഭേദിച്ചു.

“ഹലോ, മിസ്റ്റർ മനു..എന്നെ എന്തിനാ ഇവിടെ കൊണ്ടുവന്നേക്കുന്നെ?”

“താൻ സിഗരറ്റ് വലിക്കുന്നത് കാണിക്കാനാണോ?”

അത് പറഞ്ഞു കഴിഞ്ഞതും അയാൾ എന്നെ തുറിച്ചുനോക്കി.

ആ നോട്ടത്തിൽ ഭസ്മമായി പോകുമോ എന്ന് വരെ ഞാൻ സംശയിച്ചു.

ഞാൻ പറഞ്ഞത് വക വെയ്ക്കാതെ അയാൾ വീണ്ടും ഒരു സിഗരറ്റ് കൂടെ എടുത്ത് കത്തിച്ചു.

അത് എന്നെ കൂടുതൽ ദേഷ്യത്തിലേക്കാണ് നയിച്ചത്.

ഞാൻ ശബ്ദമുയർത്തി അയാളോട് ദേഷ്യപ്പെട്ടു.

‘“ഡോ… തന്നോടാണ് ഞാൻ സംസാരിക്കുന്നെ..ഇതെന്താ,തന്റെ പേക്കൂത്ത് കാണാനാണോ എന്നെ ഇവിടംവരെ കൊണ്ട്വന്നത്?? എനിക്ക് ദേഷ്യം വരുന്നുണ്ട് കേട്ടോ…!!”

ഞാൻ പറഞ്ഞതിനല്ലായിരുന്നു അയാളുടെ മറുപടി.

വായിൽ സിഗരറ്റ് വച്ച് തന്നെ അയാൾ എന്നോട് സംസാരിച്ചു.

“അതെ.. ജനുവരി മുതൽ ഞാൻ ലൂർദ് ഹോസ്പിറ്റലിൽ ജോലിക്ക് കേറാൻ പോകുവാ..'”

“അതിനിപ്പോ ഞാൻ എന്ത് ചെയ്യണം”

ദേഷ്യത്തിൽ അയാളെ ഒന്ന് അഭിനന്ദിക്കുകപോലും ചെയ്യാതെ ഞാൻ മറുപടി നൽകി.

“നീ ഒന്നും ചെയ്യണ്ട..ജോലിക്ക് കേറുന്നത് നീ അറിഞ്ഞിരിക്കണമെന്ന് തോന്നി.”

അത് കേട്ടതും ഞാൻ പുച്ഛത്തോടെ ഒന്ന് മൂളി.

‘“നിന്റെ പഠനം എങ്ങനെ പോകുന്നു?.”

“കുഴപ്പമില്ല.അതിനു കുറവൊന്നും ഇല്ല”

എന്ന് പറഞ്ഞപ്പോൾ അയാൾ എന്നെ ഒന്ന് തുറിച്ചുനോക്കി.

അയാൾ കുറച്ച്നേരം നിശബ്ദമായി നിന്നു.

ഞാനും ഒന്നും മിണ്ടാൻ പോയില്ല.

പെട്ടെന്ന് എന്നെ അത്ഭുതപ്പെടുത്തിക്കൊണ്ട് അയാൾ എന്നോട് ഒരുകാര്യം ചോദിച്ചു.

“നീ അന്ന് പറഞ്ഞ ആ ഇഷ്ടം, എന്നോട് ഇപ്പോളും ഉണ്ടോ?”

അത് കേട്ടതും ഞാൻ ആകെ നടുങ്ങിപ്പോയി.

എന്ത് പറയണം എന്നറിയാതെ ഞാൻ നിശ്ചലനായി നിന്നു.

“അന്ന് നീ പോയതിന് ശേഷം നീ എനിക്കായി വരച്ച എന്റെ ചിത്രം ഞാൻ നല്ലതുപോലെ നോക്കി..

അതിൽ നിനക്ക് എന്നോടുള്ള നിഷ്കളങ്കമായ സ്നേഹം എടുത്തു കാണിക്കുന്നുണ്ടായിരുന്നു.
കുറെ ആലോചിച്ചു.
നിന്നെക്കണ് കാര്യം പറയണമെന്നുണ്ടായിരുന്നു. നിന്റെ വീടിന്റെ അടുത്ത് വന്നു.
സ്കൂളിൽ വന്നു.

പക്ഷെ നിന്റെ മുമ്പിൽ വന്നു നില്ക്കാൻ എനിക്ക് നല്ല മടിയായിരുന്നു.

അത് കൊണ്ട് ഞാൻ പരമാവധി നിന്നിൽനിന്നും ഒളിച്ചാണ് നടന്നത്..

അന്ന് നീ ഇറങ്ങിപ്പോയതിന്ശേഷം മനസ്സിൽ മുരിക്കിന്റെ മുള്ള് കൊണ്ട നീറ്റലായിരുന്നു..!!

നിന്നോട് എനിക്കും അതെ ഇഷ്ടം തോന്നിത്തുടങ്ങിയെന്ന് എനിക്ക് മനസ്സിലായി. പിന്നെ, നിന്റെ പരീക്ഷ കഴിയാൻ കാത്തിരിക്കുകയായിരുന്നു.”

വാ തോരാതെ സംസാരിക്കുന്ന മനുവേട്ടനെ ഞാൻ അത്ഭുതത്തോടെയാണ് നോക്കി നിന്നത്..

കൈയ്യിലെ സിഗരറ്റ് കുറ്റി അപ്പോളും ഏരിയുന്നുണ്ടായിരുന്നു.

ഒന്നും പറയാൻ പറ്റാത്ത വിധം എന്റെ നാവു ഇറങ്ങിപ്പോയി.

“അന്നത്തെ ആ ഇഷ്ടം ഇന്നും നിനക്ക് ഉണ്ടെങ്കിൽ…എന്നോട് ക്ഷമിച്ചുകൂടെ നിനക്ക്..?
എനിക്ക് നിന്നെ വേണം, എന്നും എന്റെ കൂടെ, എന്നൊരു ആഗ്രഹം..”

അത് കേട്ടപ്പോൾ ഞാൻ എന്നെ ആന്നെ തട്ടിയെഴുന്നേല്പിക്കാൻ ശ്രമിച്ചു.

ഒരു ദീർഘ നിശ്വാസമെടുത്ത് ഞാൻ മനുവേട്ടന് നേരെ തിരിഞ്ഞു കൈകെട്ടി നിന്നു.

“അതെ..ഇപ്പൊത്തന്നെ നാലാമത്തെ സിഗരറ്റാ.. എന്റെ മുമ്പിൽ വെച്ച് തന്നെ വലിക്കുന്നത്. ഇന്നത്തേക്ക് തത്ക്കാലം അത്രയും മതി കേട്ടോ”

എന്നും പറഞ്ഞു ഞാൻ പുഞ്ചിരിച്ചു.

ആ പുഞ്ചിരിയിലെ സമ്മതം വായിച്ചെടുത്ത മനുവേട്ടൻ എനിക്കും ഒരു പുഞ്ചിരി സമ്മാനിച്ചു.

അത് ഒരു പൊട്ടിച്ചിരിയിലായിരുന്നു അവസാനിച്ചത്.

“ഈ സ്ഥലം എനിക്ക് ഇഷ്ടായി. ഞാൻ ഇവിടെ ആദ്യമായിട്ടാ വരുന്നത്..”

അത് കേട്ടതും മനുവേട്ടൻ എന്റെ കൈ കോർത്ത് പിടിച്ചുകൊണ്ട് പറഞ്ഞു.

“ഇനി നമ്മൾ കാണാൻ കിടക്കുന്നതെ ഉള്ളു..ഇതല്ല ഇതിനുമപ്പുറം..കുറെ…”

ആ വാക്കുകൾ എന്നെ പ്രണയത്തിന്റെ വാതിൽക്കൽ എത്തിച്ചു.
പറഞ്ഞറിയിക്കാൻ പറ്റാത്ത ഒരു സന്തോഷമായിരുന്നു അന്നെനിക്കുണ്ടായത്.

കുറെ നേരം അവിടെ നിന്ന് സംസാരിച്ചു. എന്തിനെക്കുറിച്ചാണ് സംസാരിച്ചതെന്ന് ഞങ്ങൾക്ക് രണ്ടാൾക്കും മനസിലാകുന്നില്ലായിരുന്നു.

ഞങ്ങൾ എന്തൊക്കെയോ പറഞ്ഞു കുറെനേരം സമയം ചിലവഴിച്ചു.

നേരം വൈകിക്കണ്ട എന്നും പറഞ്ഞു ചേട്ടൻ ബുള്ളെറ്റ് സ്റ്റാർട്ട് ചെയ്തു. ഞാൻ കയറിയിരുന്നു.

“അതെ..എനിക്ക് വാലായ്മ ഒന്നുമില്ല..എന്നെ മുട്ടിയിരുന്നാൽ ആകാശം ഇടിഞ്ഞുവീഴത്തില്ല”

കേട്ടപാതി ഞാൻ അയാളെ കെട്ടിപ്പിടിച്ചു.

അയാളുടെ ശരീരത്തിന് ഒരു പ്രത്യേക ചൂടായിരുന്നു..അത് എന്റെ ശരീരത്തെ അലിയിച്ചു കളഞ്ഞു..ബുള്ളറ്റിൽ ചീറിപ്പാഞ്ഞു പോകുമ്പോൾ സ്വർഗം കിട്ടിയത് പോലെയാണ് അനുഭവപ്പെട്ടത്.

കുറച്ചുദൂരം ചെന്നപ്പോൾ ഞാൻ അയാളുടെ തോളിൽ മുറുകെ കടിച്ചു.

“ഡാ…ചെറുക്കാ, നീ എന്നെ കൊന്നെടുക്കുമോ?”

വേദനിച്ചപോലെ അയാൾ പറഞ്ഞു.

“അതെ …അന്നെന്നെ കരയിച്ചില്ലേ..അതിന് പകരം വീട്ടിയതാ…”

അത് കേട്ടതും അയാൾ പൊട്ടിച്ചിരിച്ചു..

കളിച്ചും ചിരിച്ചും ഓരോന്ന് പറഞ്ഞും മണിക്കൂറുകൾ പോയതറിഞ്ഞില്ല.

ഞങ്ങൾ എന്റെ വീട്ടിലെത്തി.

“ദേ.ഞാൻ ഇവനെ കൊണ്ടുപോയത് പോലെ തന്നെ ഭദ്രമായി തിരിച്ചു കൊണ്ടുവന്നിട്ടുണ്ട്.”

മനുവേട്ടന്റെ ആ വാക്കുകൾ അമ്മയെ ചിരിപ്പിച്ചു.

കയറുന്നില്ല, വീട്ടിൽ അമ്മ കാത്തു നിൽക്കുന്നുണ്ടാകും എന്ന് പറഞ്ഞ് ചേട്ടൻ വണ്ടി സ്റ്റാർട്ടാക്കി.

പുറകിലേക്ക് തിരിഞ്ഞ് എന്നെ നോക്കി കണ്ണിറുക്കി കാണിച്ചിട്ട് ചേട്ടൻ പാഞ്ഞു….

പ്രണയത്തിന്റെ പൂമൊട്ടുകൾ വിരിഞ്ഞ സന്തോഷം, ഞാൻ എന്റെ മുറിയിലെ ഓരോ വസ്തുക്കളിലും കാണിച്ചു..

സന്തോഷം കൊണ്ട് ഒരു ഭ്രാന്തനെപ്പോലെ മുറിയിൽ കുറെ തോന്ന്യാസങ്ങൾ കാണിച്ചുകൂട്ടി..

പാട്ട് വച്ച് തുള്ളാൻ തുടങ്ങി.
അങ്ങനെ ഓരോ കോപ്രായങ്ങൾ.

സന്തോഷം ഒരാളെ ഇങ്ങനെ ഭ്രാന്തനാക്കുമെന്ന് ഞാൻ ആദ്യമായിട്ടാണ് മനസ്സിലാക്കിയത്.

അത്താഴം കഴിഞ്ഞു ഞാൻ നേരെ ഉറങ്ങാനാണ് പോയത്.

മര്യാദയ്ക്കുറങ്ങിയിട്ട് കുറച്ചു നാളുകളായി.

കിടക്കാൻ വേണ്ടി തയ്യാറെടുക്കുമ്പോളാണ് ചേട്ടൻ മുറിയിലേക്ക് വന്നത്.

മൊബൈൽ നീട്ടി എന്റെ കയ്യിൽ തന്നിട്ട് “നിനക്കാ..” എന്ന് പറഞ്ഞു.

ഞാൻ “ഹലോ” എന്ന് പറഞ്ഞപ്പോൾ

“ഡാ,ചെക്കാ..എന്താന്നറിയില്ല. ഭയങ്കര സന്തോഷം തോന്നുന്നു. കിടക്കുന്നതിന്ന് മുമ്പ് ഒരു സിഗരറ്റ് കൂടെ വലിച്ചോട്ടെ. ഒരു രസത്തിനു”

മുമ്പിൽ എന്റെ ചേട്ടൻ നിൽക്കുന്നത് കൊണ്ട് എനിക്ക് അധികമൊന്നും പറയാൻ പറ്റിയില്ല.

ശെരി ,ആയിക്കോ..ഗുഡ് നൈറ്റ്. നാളെ കാണാം !!

എന്നും പറഞ്ഞ് ഞാൻ ഫോൺ കട്ട് ചെയ്തു.

ചേട്ടൻ ഫോണുമായി തിരികെ പോയപ്പോൾ ഞാൻ ചാടി കിടക്കയിൽ വീണു.

മനസ്സിലെ വലിയൊരു ഭാരം ഇറക്കി വെച്ച് ഞാൻ ആശ്വാസത്തോടെ കിടന്നുറങ്ങി.

അങ്ങനെ ഡിസംബർ 25 ക്രിസ്തുമസ്സായി.

ക്രിസ്തുമസ് എനിക്ക് ഏറ്റവും പ്രിയപ്പെട്ട ദിവസമാണ്.

ഉണ്ണിയേശുവിനെപ്പോലെ തന്നെ ഞാനും അന്നാണ് ഭൂമിയിലേക്ക് പിറന്നു വീണത്.
എന്റെ പിറന്നാൾ !!.

രാവിലെ എഴുന്നേറ്റ് അമ്പലത്തിൽ പോയി നേർച്ചയും വഴിപാടും കഴിപ്പിച്ചു വന്നു.

വീട്ടിൽ അമ്മയുടെ വക പായസവും പലഹാരങ്ങളും ഉണ്ടായിരുന്നു.

നന്ദുവും കൂട്ടരും പിന്നെ ക്ലാസ്സിലെ ഗ്യാങ്ങും വീട്ടിലേക്ക് വന്നു.

അവർ ഒരു കേക്ക് വാങ്ങികൊണ്ടാണ് വന്നത്.

അത് മുറിച്ചു ഞങ്ങൾ എന്റെ പതിനഞ്ചാമത്തെ പിറന്നാൾ ആഘോഷിച്ചു.

എനിക്ക് വേണ്ടി അവർ സമ്മാനങ്ങളും കൊണ്ടുവന്നിട്ടുണ്ടായിരുന്നു.

ചേട്ടൻ വാങ്ങിത്തന്ന ഷർട്ടും ജീൻസും ആയിരുന്നു എന്റെ പിറന്നാൾ കോടി.

മനുവേട്ടൻ കൂടെ ഉണ്ടായിരുന്നെങ്കിൽ അടിപൊളി ആയേനെ..പക്ഷെ പുള്ളിക്ക്എന്റെ പിറന്നാൾ അറിയില്ലലോ !!
ഞാൻ ഇതുവരെ പറഞ്ഞിട്ടുമില്ല.

ഞങ്ങുടെ കൂട്ടത്തിലുള്ള മൂന്ന്പേർ ക്രിസ്ത്യാനികളാണ്..അത് കൊണ്ട് ഉച്ചയ്ക്കുള്ള ഭക്ഷണവും ക്രിസ്തുമസ് ആഘോഷങ്ങളും അവരുടെ വീട്ടിലായിരിക്കും.

ഇത്തവണ ക്രിസ്തുമസിന് ജോണിന്റെ വീട്ടിൽ കൂടാമെന്ന് നേരത്തെ ഉറപ്പിച്ചതായിരുന്നു.

അവന്റെ വീട്ടിൽ അവന്റെ അമ്മയുടെ വക സ്വാദിഷ്ടമായ കുറെ സ്പെഷ്യൽ ഉണ്ടായിരുന്നു.

കേക്കുഉം വൈനും പിന്നെ എല്ലാവരും ഒത്തുകൂടിയപ്പോൾ ഉണ്ടായ ലഹരിയും പറഞ്ഞറിയിക്കാൻ പറ്റാത്ത സന്തോഷമായിരിന്നു.

അപ്പോളും എന്റെ മനസ്സിൽ മനുവേട്ടൻ നിറഞ്ഞിരുന്നു.

പരിപാടി എല്ലാം കഴിഞ്ഞു ഞാൻ വീട്ടിൽ മടങ്ങിയെത്തി. അപ്പോൾ സമയം അഞ്ച് കഴിഞ്ഞിരുന്നു.

ഞാൻ, ജോണിന്റെ അമ്മ തന്നുവിട്ട കേക്ക് അമ്മയുടെ കൈയ്യിൽ കൊടുത്തു, എന്റെ മുറിയിലേക്ക് പോയപ്പോൾ, നിനക്ക് ഒരാൾ ഒരു സാധനം കൊണ്ടുവന്നു തന്നിട്ടുണ്ട്, വേഗം ചെന്ന് നോക്ക് എന്നമ്മ പറഞ്ഞു.

അവിടെ മുറിയിൽ വലിയൊരു സമ്മാനപ്പൊതി എന്നെ കാത്തിരിക്കുന്നുണ്ടായിരുന്നു.

അത്ഭുതത്തോടെ ഞാനത് തുറന്നു നോക്കി.
അതിനുള്ളിൽ ഉണ്ടായ സമ്മാനം എന്നെ വല്ലാതെ ആശ്ചര്യപ്പെടുത്തി….!!

“റൂബിക്സ് ക്യൂബ്”!!

ഒരു വലിയ റൂബിക്സ് ക്യൂബ് ആയിരുന്നതിന്റെയുള്ളിൽ.

ഓരോ ചതുര കളങ്ങളിലും ഓരോ ഇംഗ്ലീഷ് അക്ഷരങ്ങൾ.

പക്ഷെ, റൂബിക്സ് ക്യൂബ് ക്രമീകരിച്ചതല്ലായിരുന്നത് കൊണ്ട് അതിൽ ഒളിപ്പിച്ച കാര്യം എന്താണെന്ന് ഒന്നും മനസിലായില്ല.

റൂബിക്സ് ക്യൂബ് എനിക്ക് ചെറുപ്പം മുതലേ വളരെ കൗതുകം ഉയണർത്തിയ ഒരു വസ്തുവായിരുന്നു.

വളരെ ചുരുങ്ങിയ സമയം കൊണ്ട് ക്യൂബ് സെറ്റ് ചെയ്യുന്നത് എനിക്ക് ഹരമായിരുന്നു. അതിന്റെ മത്സരങ്ങളിൽ എനിക്ക് സമ്മാനങ്ങളും ലഭിച്ചിട്ടുണ്ട്.

ആദ്യമായിട്ടാണ് അതിൽ രഹസ്യം ഒളിപ്പിച്ചൊരാൾ എനിക്ക് നൽകിയത്.

വെപ്രാളം പിടിച്ചത് കൊണ്ടായിരിക്കും,കുറെ സമയമെടുത്താണ് ഞാൻ അത് ക്രമീകരിച്ചത്.

അതിലെ സന്ദേശം എന്നെ വല്ലാതെ സന്തോഷിപ്പിച്ചു.

ചുവപ്പ് ചതുരങ്ങളിൽ ” I Love U” എന്നും
പച്ച ചതുരങ്ങളിൽ “HPY XMS DR” എന്നും
മഞ്ഞയിൽ “HPY BDY DR” എന്നും
വെള്ളയിൽ “DER IS GFT” എന്നും
നിലയിൽ “LUK UR BAG” എന്നും
ഓറഞ്ച് ചതുരങ്ങളിൽ “SEE U TDY” എന്നുമായിരുന്നു എഴുതിയിരുന്നത്.

ഇത് മനുവേട്ടന്റെ വികൃതി ആണെന്ന് എനിക്ക് മനസിലായി.

ആദ്യമായിട്ടാണ് ഒരാൾ എനിക്ക് ഇങ്ങനെ പ്രത്യേക രീതിയിൽ സമ്മാനം നൽകുന്നത്.

ആകാംഷയോടെ ഞാൻ എന്റെ ബാഗ് പോയി തുറന്നുനോക്കി. അതിൽ ഉണ്ടായിരുന്ന സമ്മാനം എന്റെ മനം കവർന്ന ഒന്നായിരുന്നു.
ഒരു ബഹുവിചിത്ര വര്‍ണ്ണരൂപദര്‍ശിനി(kaleidoscope).

ഞാൻ അതിൽ ഒരു ചെറിയ കടലാസ് തുണ്ടിട്ടു..എന്റെ കണ്ണുകൾ പുളകമണിഞ്ഞ കാഴ്ചയായിരുന്നു അതിൽനിന്നും എനിക്ക് ലഭിച്ചത്.
അതിന്റെ കൂടെ ഒരു ചെറിയ കുറിപ്പും കൂടെ ഉണ്ടായിരുന്നു.
“ഹാപ്പി ബർത്ത്ഡേ മുത്തേ..
നിനക്കായി ഞാൻ ഒരുക്കിയ സമ്മാനം നിന്നെയും കാത്തിരിക്കുന്നു..വേഗം വീടിന്റെ വലതുവശത്തുള്ള മതിലിന് മുകളിൽ നോക്കുക.”

ഒന്നും നോക്കിയില്ല, ഓടിച്ചെന്ന് ഞാൻ മതിലിന് മുകളിൽ നോക്കി.
അവിടെ ചുവപ്പ് നിറത്തിൽ തിളങ്ങുന്ന ഒരു ബർത്ത് ഡേ കാർഡ്.

ആകാംക്ഷയോടെ ഞാനത് തുറന്നു നോക്കി. [ തുടരും )